Ontanga bebandla leZanu PF babuthene behlabela ingoma zokuthuka abenhlanganiso ezitshiyeneyo ezibalisa lezabagogekileyo abphakathi kokutshengisela ngokulala eAfrica Unity Square eHarare ngoLwesine. Kube lokwesabela ukuthi kungabalodlakela.
Abatshengiselayo laba babalisa abaphila lobugoga, abafelokazi kanye lezifundi zemakolitshini bamanyene labe Zimbabwe Women In Politics abe Zimbabwe Activists Alliance ( ZAA ) kanye labenhlanganiso ye Occupy Africa Unity Square ( OAUS ) lezinye.
Abantu laba bathi bakumkhankaso wokulala lokutshona e Africa Unity Square okwamalanga alitshumi lasithupha ukubamba ngamandla uhulumende we Zanu PF ukuba alethe ubukhokheli obuqotho.
Inkokheli enhlanganisweni ye Zimbabwe Activists Alliance itshele intathelizindaba ukuba injongo yabo lamuhla ngeyokuthi bafuna imizila yabantu emabhanga iphele uzulu atholiswe imali yakhe.
Njalo bathi kabawafuni lakancinyane amaBond Notes, uhlobo lwemali uhulumende asefuna ukuwaletha ngenyanga ka Mfufu kanye lokuba usibalukhulu webhanga elikhulu lelizwe,u Dr John Mangudya atshiye umsebenzi.
Phezu kwakho konke,bathi bafuna uhulumende abanakekele labo abakumaqembu abhekane lenkinga ezinengi,okubalisa abalobugoga, intandane labafelokazi.
Isikhulumeli senhlanganisweni ye Zimbabwe Activists Alliance, umnu Gift Ostallos Siziba uthi bazokuqhubeka belala e Africa Unity Square uhulumende aze azilungise lezo zikhalazo zabo.
USiziba uthi ukuba khona kwabalobugoga labafelokazi, kuyisibonelo sokuba isimo singesihle elizweni.
Osakhulayo,eyingcgwethi kwezokuhlalisana kukazulu uMnu. Pride Mukono uthi ubone kufanele ukuthi aze manyana labenhlanganiso ezikhokhela lumkhankaso.
UMukono usola kakhulu usibalukhulu webanga lelizwe,u Dr John Mangudya ethi usehluleke umsebenzi.
UMkono uqonqosele amapholisa ensitha ukuba kabangakhohlwa ukuthi labo babhekane lenkinga lapho beqhuba umsebenzi wabo.
Unobhala wenhlanganiso ye Occupy Africa Unity Square uMnu. Charles Nyoni uthi kuyisibonelo sokuba selukusibanga esiphezulu udubo elizweni.
UNyoni uthi usuku lunye ngalunye kuze kuyephela amalanga alitshumi lasithupha bayabe belakho abakutsho kuhulumende ukuba akufeze.
Abatshengiselayo laba babhode emabhanga, beqala nge Reserve Bank of Zimbabwe bebekhulumisana lozulu obesemizileni ukuthi injongo kuyikuzama ukumvula amehlo bathole imali yabo kumabhanga ehlukeneyo lokuthi amalungelo abo ahlonitshwe.
