Intsha yebandla eliphikisayo ele MDC elikhokhelwa nguMnu. Nelson Chamisa ithi izangena ezitaladeni itshengisela phezu kwesimo somnotho welizwe esiqhubeka siwonakala ngamandla kubangelwa yikwehluleka kukahulumende kamongameli Emmerson Mnangagwa ukuthuthukisa impilo zabantu.
Lokhu kuphume emhlanganweni lentathelizindaba owenzelwe esigodlweni sebandla leMDC, eMorgen Tsvangirai House eHarare NgoLwesibili ngemva komhlangano wohlangothi lwabatsha olwe Youth National Council.
Umkhokheli wohlangothi lwabatsha uTererai Sithole uthe intsha izinikele ukumelana lohulumende kamongameli Emmerson Mnangagwa ngokutshengisela ezitaladeni, kuhlelo olulakho ukuqalisa kuyonale inyanga.
“Asisoze samukele leyo ngcekeza. Yingcekeza le. Sakutshela uRobert Mugabe, njalo namhlanje silapha sikutshela uEmmerson Mnangagwa . Ngemva kokuba sihlangene njenge National Council namhlanje, sazisa uhulumende lo ukuthi amalanga akhe seyanele. Sizakuba sitshengisela ngokungasuthiseki kwethu ngendlela uMnangagwa asengezelele ubuyanga ebantwini beZimbabwe.”
Unobhala wohlangothi lwabatsha kubandla leli, umnumzana Ostallos Siziba, uthi lokhu ngokunye kwabakuqoqe njengenkokheli yentsha esanda kukhethwa, abazakwenza ukuletha inguquko elizweni.
“Umhlangano lo ubungowokukhuluma lentathelizindaba, nge National Council le esiyenzileyo namhlanje njengetsha yeZimbabwe yonke siqedisa umsebenzi weCongress esawenza ngoMay lapho esikhulume ngendaba yodubo oluselizweni ikakhulu inotho, lapho thina njengabatsha esiphume khona lesivumelano sokuthi sokumele sihlangane le ZANU PF emgwaqweni sitshengisela ukuze balungise indaba yenotho.”
Umthetho owethulwe nguhulumende ngemva kodlakela oluqhamuke ekutshengiseleni kukaZibandlela wokuvimba ukutshengisela, ubikwa uzakwenza kube nzima ukuthi intsha le ifeze lokhu.
Kodwa umfoka ka Siziba uthi lokhu bazamelana lakho emithethwandaba kanye lakudale lephalamende ngoba kulilungelo lomuntu wonke phansi kwesisekelo sombuso welizwe.
Sizayilwisa edale lephalamende njalo lasedale lasemathethwendaba elizwe
Kunjalo nje, amalunga wohlangothi lwabasakhulayo beMDC ethule amazwi enduduzo emulini kamuyi uNkosikazi Vimbai Tsvangirai Java obhubhe izolo esibhedlela seWest End eHarare.
Intsha le ithi idaniswe kakhulu ngokulahlekelwa ngomunye wabo obekhuthele ekusebenzeleni ibandla lelizwe lonke.
Unkosazana Musa Dube ongomunye wabatsha uthe balahlekelwe ngowesifazane okade eyisibonelo esihle kwabatsha.
“Thina njengentsha ye MDC sikhathazekile ngokubhubha kukankosikazi Vimbai Tsvangirai, ngumuntu owaye sebenza lentsha kuhle wayethanda sibili ukuhamba phambili ngomsebenzi wabatsha hayi kubuhlungu sibili, sikhathazekile ngokubhubha kwakhe”
Umkhokheli webandla le MDC umnumzana Nelson Chamisa laye namhlanje wethekele umuzi womdeni kamuyi lapho aduduzane lezinye iziphathamandla zebandla le MDC kanye labemuli yonke izihlobo labangane.
UChamisa uthe kulusizi ukuthi ibandla leMDC lilahlekelwe njalo ngomunye wasemdeni kaTsvangerai izinyembezi zokukhala umuyi owasungula leli bandla uMnu. Morgen Tsvangirai zingakawomi.
