amalinks wokungena

Breaking News

Iqembu leHighlanders Liphuthsa Umnyaka Ngenkezo yeEasycall


Abasekeli beqembu leHighlanders
Abasekeli beqembu leHighlanders

Abalandeli beqembu le Highlanders baphutshe umnyaka bethokoza ngemva kokuba iqembu leli liphakamise inkezo yeEasycall kodwa indlela elidlale ngayo kumidlalo ye PSL ikhathaze abanengi.

Ekuqaleni kwalonyaka iqembu leHighlanders liqhatshe umqeqetshi uBongani Mafu ukuba athathe isikhundla ebesiphethwe nguMark Mathe ngemva kokutshiya umsebenzi kuka Kelvin Kaindu nyakenye.

Umfoka Mafu uthembise ukuba iqembu le Bosso lizadleka nzima kodwa akusamhambelanga njengokufisa kwakhe ngoba leliqembu lehluleke ukunqoba amaqembu abevele edlala kusigaba se PSL lenelisa ukukhulela amaqembu amancane avele kusigaba sika Division One.

Indubo zeqembu le Highlanders bezingasizo ezenkundleni kuphela ngoba like lathwala amagabha avuzayo selimangelelwe ngowayengumdlali walo uMasimba Mambare yena ebelimkweleda imali.

Lenelisile iqembu le Highlanders ukunqabela ukuthathelwa impahla obesekumele ithengiswe ukuze kubhadalwe uMambare kodwa isiphathamandla seBosso uNdumiso Gumede ngalesosikhathi uchaze udaba lukaMambare njengesibonelo sokuba kulabantu abaziphilisa ngokulwisana leqembu.

"UMambare akazange aze lapha ukuthi sibonisane lathi sitsho ukuba singabe simupha malini ukuze siqede isikwelede sakhe. Okwenzakalayo yikuba bakhona abamlanda bambuza ukuba engabe watshiya imali zakhe yini nxa zikhona bona bazamlwela labo bathole ingxenye yemali yakhona nxa eseyiphiwe" kutsho uGumede.

Kuthe sekusele imidlalo eyithoba munwe munye ukuba imidlalo yeligi ifike komlindi uyacina uMafu ulahlekelwe ngumsebenzi indawo yakhe yathathwa nguAmini Soma – Phiri yena obesebenza ndawonye lo Cosmas Zulu.

USoma – Phiri uqhube kuhle kakhulu njengoba enelise ukuqeda imidlalo yePSL iqembu le Highlanders likuzinga lesithupha engalaneni yemiklomelo waphinda njalo waphakamisa inkezo ye Easycall Cup.

Loba kunjalo inkokheli yeqembu le Bosso ithi uSoma – Phiri lo Zulu kabasoze baqhubekele phambili beqeqetsha leliqembu kodwa kuqhatshwa umqeqetshi omutsha ovela phetsheya kolwandle.

Ekhuluma lentatheli ngoLwesine olwedluleyo uSoma – Phiri uthe inkokheli yeqembu le Highlanders yayivele ingabaphanga lumsebenzi ngesihle.

"Isituation ebesisebenza kuyo ibinzima ngoba ama results abefuneka khonapho khonapho. Bayakwazi ukuthi thina abanye abantu abadlisa iHighlanders mina lomdala asibathandi yikho mhlawumbe babezama ukusithulisa ngokuthi singehluleka ukuqeqetsha iqembu kuthiwe lathi salithola ithuba sehluleka" kutsho uPhiri.

UZulu yena uthi wemukela isicelo sokuba azophathisa iqembu le Highlanders ngoba efuna ukuletha injabulo kubalandeli beqembu njalo lokhu wenelisile ukukufeza.

Ukaputeni weqembu le Highlanders uFelix Chindungwe laye ugcizelele ukuba uyathokoza ngoba abalandeli baleliqembu beqede umnyaka bethokoza ngemva kokuhlukumezeka phakathi komnyaka leliqembu liqhuba nzima kumidlalo yeligi.

Lonyaka njalo iqembu le Highlanders lenelise ukuthola amabhasi amabili eyinye kuyileyo ethengwe iqembu liphathiswa nguRtd Colonel Tshinga Dube ikanti eyinye ivele kunhlanganiso ye Nyaradzo.

Umqeqetshi okhangelelwe ukuphatha kuqembu le Highlanders ngomnyaka ozayo ngu Errol Akbay yena oyisizalwane selizwe le Holland yena oke wafika wazokhulumisana lenkokheli yeqembu ensukwini ezedluleyo.

XS
SM
MD
LG