amalinks wokungena

Breaking News

Abenhlanganiso Zabaphila Ngokuthengisa Basole Ukutshaywa Lokubotshwa Kwamalunga


Abaphila ngokuthengisa ezitaladini zeHarare.(Umfanekiso siwuphiwa nguMavis Gama)
Abaphila ngokuthengisa ezitaladini zeHarare.(Umfanekiso siwuphiwa nguMavis Gama)

Abenhlanganiso ezilwela ilungelo labaphila ngokuthengisa ezitaladeni, basole kakhulu ukutshaywa lokubotshwa kwamanye amalunga abo kanye lenkokheli ye National Vendors Union Zimbabwe, ngoLwesibili, ngamapholisa kamanisila ngoba beye emahofisini akhe awe Town House belandela impahla abekade beyithathelwe.

Emhlanganweni lentathelizindaba ngoLwesithathu ekuseni, owenzelwe eMedia Centre eHarare, lezinkokheli ezibalisa eye National Vendors Union Zimbabwe, eye Zimbababwe Informal Sectors’ Organisations, leyeCombined Harare Residents Association, zithi zidaniswe yisehlakalo sangoLwesibili zisithi kumele bakhululwe laba bantu.

Umsekeli kamgcinisihlalo we board ye NAVUZ umnumzana Douglas Shumbayaonda utshele intathelizindaba kulomhlangano ukuba lanxa bevumelana lombono kahulumende wokususa abathengisa ezitaladeni ndawana yonke baphambana lendlela esetshenziswayo.

Wakhuthaza inkokheli kahulumende uShumbayaonda, ukuba ibohlanganela lenhlangothi zonke ziphatheke ekudingeni indlela zokululungisisa linkinga hatshi ukubahlukuluza.

Umqondisi wenhlanganiso ye Zimbabwe Informal Sectors Organisations – ZISO, umnumzana Promise Mkhwananzi, usole udlakela oselusetshenziswa, ukususa laba bantu lapho basebenzela khona, kwabotshwa abalitshumi lasithupha ( 16 ) izolo, okubalisa lenkokheli yenhlanganiso zabo.

UMkhwananzi, uthi inkinga yikuba ilizwe libuswa nguhulumende ongazihluphiyo ukulalela amacebo abanye, ezitshela ukuba nguye owaziyo kuphela, ikanti akunjalo.

Umqondisi wenhlanganiso ye Combined Harare Residents Association, umnumzana Mfundo Mlilo, uthi bakhathazekile labo njengenhlanganiso, ngezehlakalo zayizolo, zokutshwaywa kwabantu, inengi labo kungabesifazane, kwabangela ukubotshwa kwamalunga lenkokheli ye NAVUZ.

Ukhuthaza inkokheli kumanisipala uMlilo, azihlolisiso lezi zehlakalo, sazakale isisusa esibangele ukukhonona kwabathengisa ezitaladeni laba. Ethi kumele amapholisa kamanisipala achaze ukuba kungani ekhethe ukusebenzisa udlakela ukulungisisa inhlupho abakade beze lazo eTown House.

Act>3 /////////// Mlilo on worry ///////////

Abenhlanganiso lezi bakhala njalo ngendlela uhlelo lokubhaliswa kwamagama, alabo abathengisa ezitaladeni, kwenziwa ngayo, besithi kukhanya kukhangelwa ukuba ungowaliphi ibandla umuntu odinga indawo yokuthengisela kulezo ezintsha.

Imibiko esanda kuphuma ithi bazamiswa phambi komthethwandaba kusasa ekuseni ababotshwe izolo laba, besetheswa umlandu wokuphazamisa ukuthula edolobheni.

Kunje lokhe basezandleni zamapholisa eZimbabwe Republic Police. Okwamanje ababotshiweyo abagoqela inkokheli ye NAVUZ, umnumzana Sten Zvorwadza, umqondisi wayo umnumzana Samuel Wadzai kanye lobona ngezokuqhutshwa komsebenzi kiyo, unkosazana Lucy Makunde.

XS
SM
MD
LG