Zikhanya ziqonga izehlakalo zokuhlukumezana lokulwisana okukhulu kwabeZimbabwe abayizithandani labatshadileyo, kwele Bhilithane, kubangelwa yikutshona abantu bezivalele ezindlini phansi kweziqondiso zikahulumende zokwalela abantu ukuhambahamba, ezelockdown emizameni yokuvimba ukuthelelanwa lula komkhuhlane weCoronavirus.
Amapholisa aweNgilandi abika ukuba inani labantu abahlukunyuzwayo ezindlini liyaqansa okwethusayo lokhu ilockdown yaqalayo njalo inengi libotshiwe.
UNkosazana Thoko Sibanda Southend On Sea uthi umkakhe sevuke ubheyane ehlukumeza imuli yonke.
“Uyazi kwaba lokungazwani nje endlini umkami waqala ukuba lolaka waqala ukuxabana labantwana esengumuntu ongasaqedakeliyo. Kuthe ngoLwesihlanu lweEaster nangu esithi ungizwe ngikhuluma efonini lomuntu oyindoda. Wangitshaya ngama mpama engikhama engivumisa ethi ngiconfess into engingayaziyo. Eqeda lapho ethatha iphone yami eyitshayelela phansi yafa. Ngazama ukuthi ngifonele abakibo ukuthi ngibatshele yena manje kafuni ukhuluma labo so kunjenje sihlezi sonke endlini asikhulimisani."
UNkosazana Monica Nkomo laye uthi umkakhe umthwalise amagabha avuzayo.
"Kuhlezi kuliwa lapha ekhaya. Amapholisa eLeeds seze sazi ngoba he abuses me all the time and my parents want me to be patient bathi indoda iyabekezelelwa. Silabantwana abangu two and bayabona okwenzakaayo sisilwa njalo nje. Khathesi ubotshiwe and kwathiwa angahlali endlini kodwa my parents bathi ngimekele abuye endlini ngenze le abantwana.”
Ukutshaya umfazi kulelilizwe kuyabophisa. UMnu. Norman Mshonga zamkhalela. Usevela miswa phambi komthethwandaba oweBirmingham.
"Njengoba liyazi isikhathi seLockdown akulnto ongayenza, unkosikazi wangithathela i-remote (control) efunukubukela okwakhe. Ngamjwamulela ngenkani lami. Nangu umuntu ebuya lamanzi engithela ngamanzi. Ngokwethuka-ke lami ngasukuma ngamfuqa ngoba vele kwasokumanzi phansi watshelela wayakuwa walimala isandla. Nanka amapholisa asefikile endlini babefika bengibopha bengithatha behamba lami. Ngahamba ngayangena icourt, ecourt bafika bangicharger nge assault bangibhadalisa ifine ye250 pounds, so ngilapha sengile criminal record."
Ayisibo abesifazana bodwa abahlukunyezwayo. Kukhona labesilisa abadla kaluklubhu. UMnu. Tawanda Ncube ngomunye wabo.
"Mina yimi engihlukunyezwa ngumfazi. Just last week wakhohlwa to log out kucomputer and ngabona imhlolo. KuFacebook kumessenger ngabona exoxa lamadoda betshelana ezothando. Ngabala baze baba yi-seven kukhanya uyake abonane labo ngoba babekhuluma ngezocansi. Kwangidabula kakhulu ngambuza yena wahle wavuka ngolaka wathi ngiphume endlini yakhe. Khathesi ngikomngane wami. Yena (unkosikazi) nguye olomsebenzi ongcono yikho engidelela. Silomtwana oyedwa kodwa yena ulabakhe ababili from a previous marriage."
UNkosazana Nokuthula Moyo oweSouthampton, osebuhlungwini ngokuhlukunyezwa,uthi semelele ilockdown ukuba iphele esule umtshado.
"Ngile 30 years ngendile ngilabantwana abathathu kodwa ... Ilockdown iphela nje ngiyatshiya ingcekeza leyi. Useka Bheki ngambamba ekhuluma londindwa wakhe efonini sesilwa lami. Angitshaye kanje hayibo angeke ngihlalele ukuhlukunyezwa okunje. Ubehlala ephuma esithi uyatshaywa ngumoya kanti yena ukhuluma lomfazi wakhe eGoli. Ngitshelani bantu ukuthi ngenzenjani?"
UNkosazana Lynett Ndovu, ingcwethu kwezomkhuhlane wengqondo esebenzela eBedfordshire, uthi ukuqhamuka komkhuhlane weCoronavirus ngeyinye yembangela yokudlephana osokuvamile kwabathetheneyo.
"Abantu bengahlala bevalelwe ndawonye okwesikhathi eside bacina behlukumezeka, kubelenkulumo ezimbi ezicina zisenza abantu balwe. Abanye njalo i-anxiety ngokwenzakalayo kucina umuntu ephethwe ngumkhuhlane wengqondo. Ama mistakes seqala ukuvela kwabathatheneyo njalo sokulokuthonisisana nsukuzonke. Ilockdown le vele kusabalabantu abazagula kakhulu ngomkhuhlane wengqondo.”
Umkhuhlane weCOVID19 ngaphandle kokubulala abantu kukhanya uzachitha imizi yabantu abanengi. Kumnyama yonkindawo njalo kwele Bhilithane ilockdown akwaziwa ukuba iphela nini. Abantu asebefunyenwe belegciwane leCOVID-19 eNgilande sebezinkulungwane ezedlula ezilikhulu.