Abatshayeli bemota ezinkulu, ezaziwa ngelokuthi gonyeti kweleSouth Africa abadabuka eZimbabwe bathi besabela impilo zabo kanye lekusasa yabo kulandela ukutshengisela okuqhutshwe yizizalwane zeSouth Africa izolo ngokuvimba umgwaqo kuN3 eVan Reneen Pass phakathi laphakathi kweHarrismith leTugela Toll, eLadysmith, besithi abatshayeli laba kufanele bephindele emazweni abo ngoba bebathathela imisebenzi.
Babikwa bebesedlula ikhulu abakade betshengisela njalo bavimbe umgwaqo ngokufolisa imota zama trucks abo.
Omunye obone okwenzakale izolo nguMnu. Edgar Chauke otshayela i truck njalo edabuka eZimbabwe.
UMnu. Chauke uthi abatshengiseleyolaba bafike ngehola lesihlanu ekuseni, 5am, ukuzovala lindawo bevimbela abavela kwamanye amazwe.
Uthi Amapholisa aze alungisa ingxenye yomgwaqo izolo ebusuku
“Abatshayeli bezimota ezinkulu abeSouth Africa basivimbele bevlela eJohannesburg. Bebefuna ukuvimba phakathi komgwawo kodwa behluleka. Ngakho basuke baya ku pass, bavimba lapho. Kube nzima ukuthi imota ezivela nxa zombili zedlule kulindawo. Baqhube imihlangano, baqalisa lokutshaya itoyi-toyi bechothoza abavela kwamanye amazwe. Bathi bafuna uhulumende abatshele uktuhi bazabuyela nini emazweni abo abatshayeli bakwamanye amazwe ngoba babathela imisebenzi,” kutsho uMnu. Chauke.
Akusikho kwakuqala ukuthi abatshayeli beSouth Africa belwisane labavela kwamanye amazwe.
Ngenyanga kaMabasa kuwonalo umnyaka, kwaba lengxabangxoza endaweni yeMooi River ku toll plaza, ekwaZulu Natal, lapho okwatshiswa khona amanye ama trucks, njalo kwahlukunyezwa abavela kwamanye amazwe ngodaba olufanayo.
Izizalwane zeSouth Africa zisola abavela kwamanye amazwe ukuthi bayavuma ukwamukela iholo eliphansi kakhulu, okubangela ukuthi kube lukhuni ukuthi bona bethole eliphezulu, ngoba amankampani engasoze abaqhatshe.
Kodwa uMnu. Chauke uyakwala lokhu, esithi abaqhatshi bayabadinga abavela eZimbabwe ngoba besebenza gadalala njalo belolwazi lomsebenzi.
Uthi lanxa kungelamuntu olimeleyo kusehlakalo sayizolo, wesabela ikusasa yabo.
“Akulamuntu olimeleyo ngoba bekusegangeni ku pass, akunjengakuqala lapho okwakuseduze lezindlu zabantu kuma residentials. Kodwa phela thina sizaqhubeka sisebenza ngoba silencwadi zokusebenza ngokusemthethweni. Abaqhatshi labo bayasifuna kodwa njengoba sekwenzakale lokhu, mhlawumbe kungaqhamuka udlakela. Asazi ukuthi kuzakwenzakalani ngemva kwalesisehlakalo,” kugcizelela uMnu. Chauke.
Kubikwa bekunyakazela amapholisa kanye labanye abama emergency services kulindawo izolo, njalo bebexwayisa abanye abatshayeli ukuthi besebezinise ezinye indlela kumbe bezame ukuthi bengatshayeli kulindawo.
Asenelisanga ukukhuluma lohulumende weSouth Africa kumbe abakade betshengisela ngaloludaba.
