Abe UFIC Bakhuthaza Amalunga Ukuya Emthandazweni Obizwa Ngokuthi Judgment Night 2

WASHINGTON DC —  Ibandla lokholo lwesiKrestu ele United Family International Church elikhokhelwa ngumprofethi obikwa elodumo eZimbabwe uMfundisi Emmanuel Makandiwa lithi likhankasa ezigabeni zonke zelizwe ukuthi abantu bahambe ngobunengi babo emkhosini womthandazo owazakala ngokuthi yi Judgment Night 2 ngeviki ezayo enkundleni ye National Sports Stadium eHarare.

IStudio 7 itshayisane lombukiso weRoad Show eHwange, lapho amalunga ogatsha lwalelibandla kulindawo abebhoda-bhoda esazisa abantu ngalumthandazo.

Ilunga lalelibandla ebeliku Road-Show le, uMnu.Never Nyahunzvi uxoxe loSithandekile Mhlanga weStudio Seven emchasisela okunengi ngalumbuthano.