Emadolobheni angamatshumi amabili lasithupha, akulabandla elithole amavoti adlula amatshumi amahlanu ekhulwini, okulinani abalidingayo ukuze bathathe izinqumo.
Lokhu sokutshiye amabandla amakhulu akhokhelayo kweleSouth Africa ele ANC lele DA esethwele nzima ngokudinga amabandla azadlelana lawo kula amadolobho.
Kumadolobho edlula amakhulu amabili abevotelwa, ibandla le ANC linqobe emadolobheni edlula ikhulu lamatshumi ayisithupha kwathi ibandla leDA lanqoba kwalitshumi lasitshiyagalolunye.
Uhlupho oselubhekane lalawa mabandla ngolokwakha umanyano lamanye amabandla ukuze bebelenani elidingakalayo ekwenzeni izinqumo kula amadolobho angamatshumi amabili lesithupha.
Ngesikhathi kuqhutshwa ukhetho, ibandla leDA, ANC, le EFF abetshelana amazwi aqatha esolana okumangalisayo. Kodwa khathesi lamabandla sekudingeka ukuthi akhe umanyano emadolobheni edlula amatshumi amabilii.
Le yinto esinzima kakhulu nxa kukhangelwa ukuthi injongo zalamabandla zehlukene kakhulu.
Edolobheni lePretoria iDA idinga ukugcwalisela amavoti ayo ngokudlelana lebandla leEFF, kodwa ingcitshi kwezombusazwe umnumnzana Piet Croucamp uthi lobubudlelwano buzakubanzima.
Ngakwelinye icele umkhokheli weDA umnumnzana Mmusi maimane uthi ibandla lakhe ngeke libambane le ANC ngoba esithi libandla elingasafunwa ngabantu.
Edolobheni leJohannesburg, ibandla leANC lalo lidinga elizamanyana lalo ukuze lithole amavoti edlula amatshumi amahlanu kodwa ke umkhokheli we EFF umnumnzana Julius malema usekubeke kwacaca ukuthi ibandla lakhe alisoke limanyane leANC.
Le yinto ezakwenza ukuthi ibandla leANC lizithole selilobunzima obukhulu ekutholeni amabandla elizamanyana lawo lapho elithole khona amavoti angaphansi kwamatshumi amahlanu ekhulwini njengoba amavoti atholwe ngamanye amabandla amancane emalutshwane okumangalisayo.
Kodwa uCroucamp uthi vele i ANC le DA nxa bekukhona okunye ezingakwqenza bezingeke zidlelane le EFF kodwa okwakhathesi la amabandla kawasela eyinye indlela.
Okwakhathesi kutsho ukuthi i EFF yona engazange ithole edolobho elikhokhelayo izaqhubeka ingumaqhuzu ngesikhathi ibandla le ANC lele DA engcenga ukudlelana layo.
