amalinks wokungena

Breaking News

Idale lamaElders Likhuthaza uMnangagwa loChamisa Ukuthi Bakhulumisane


Abadala bedale leThe Elders beloMnu. Nelson Chamisa

Abedale leThe Elders sebekhuthaze uMongameli Emmerson Mnangagwa lomkhokheli weMDC uMnu Nelson Chamisa ukuthi bahlale phansi bakhulumisane bedinga indlela zokuqeda inhlupho ezibhekane lozulu.

Iqula lalelidale elifike eZimbabwe ngoLwesihlanu, lethule linkuthazo ngoMgqibelo ngemva kokuhlangana loMnangagwa loChamisa.

Embikweni wakhe, umgcinisihlalo wamaElders uNkosikazi Mary Robinson uthe bakhathazekile kakhulu ngokuhlupheka kwabantu beZimbabwe okubangelwa yikubhidlika komnotho lokudonselana okukhona phakathi kwabezombusazwe.

Uthe ngesikhathi beze bethekelele eZimbabwe nyakenye, bathola abantu belethemba lokuthi umumo wawuzaguquka kube lobubelo empilweni bathole imisebenzi njalo baphile kuhle.

Kodwa uthi kuhambo lwabo lolu, bathole lelothemba selitshabalele ngoba umnotho usubhidlike ngamandla kanti njalo lozulu esehlalela evalweni ngemva yodlakela oluqondiswe ebantwini nguhulumende.

Ngokunjalo, amaElders athi kulesidingo sokuthi uMnangagwa, uChamisa, abamanye amabandla aphikisayo labenhlanganiso ezizimeleyo babambe iqhaza baqhobe amathambo engqondo bedinge indlela zokulungisisa isimo esikhona.

Elinye njalo ilunga lamaElders uDr Graca Machel utshele intathelizindaba ukuba lanxa bubukhulu ubunzima uzulu weZimbabwe abhekane labo, ulethemba lokuthi kungaba lokusebenzelana ndwawonye kwabezombusazwe lezinye inhlanganothi zempilo ezitshiyeneyo, ungalungisisa umumo weZimbabwe abantu baphile ngcono.

Kusenjalo, amaElders athi akhala labakhalayo ngokubhubha kukaMnu Robert Mugabe. Linhlanganiso ithi uMugabe waphatha indima enkulu ekukhululeni ilizwe. Nangu uDr Machel.

UNkosikazi Graca Machel eloMnu Nelson Chamisa
UNkosikazi Graca Machel eloMnu Nelson Chamisa

“Umongameli Mugabe wasebenza kakhulu kudaba lokukhulula leli lizwe lamanye kusigaba sangezansi lezwekazi le Africa. Wasebenza kakhulu kwezokuthuthukiswa kwaleli lizwe osekulandelwa ngabakwamanye amzwe esigabeni. Lina abasakhulayo limaze kuminyaka engamatshumi amabili edluleyo. Isicelo sami ngesokuthi libokhangela ngxazonke lapho likhuluma ngemisebenzi yakhe”

UMnu Chamisa yena uthi kubalulekile ukuthi uzulu akhalele imuli koMugabe.

“Lesi yisililo, njengabantu abansundu thina silendlela zethu zokwenza into zethu ngendlela yesintu okufana lokukhala labakhalayo.

Lanxa besilokwehlukana ngemibono lomuyi okwesikhathi eside kunhlangothi ezehlukeneyo okubalisa kwezombusazwe, indlela ayekhokhel ngayo lokuqhuba umsebenzi wakhe kodwa okwamanje sithi masimanyaneni njengesizwe, sikhale sindawonye.

Ngemva kwalokho besesithola isikhathi sokuzinuka amakhwapha sibonisane ukuthi kuyini okumele sikulungisise ”.

Umkhokheli wenhlanganiso ye#This Constitution uNkosazana Abigail Mupambi uthi lanxa kukhona okuhle okwenziwa nguMugabe, amalungelo oluntu wayengawahloniphi.

“Ngoba ngesikhathi esinengi, khona ukukhuluma esikwenzayo lokhu nga vele kakukho ngesikhathi sikaMugabe, mhlawumbe nga sile freedom of speech not freedom after the speech.

Kukhona akwenze kahle, kukhona lakho lapho ayengaziphathi kahle kodwa ke ngalesi sikhathi osekuqakathekile yikuthi sithole izifundo kulokho ayekwenza engaziphathi kahle kumbe lapho ayeqondisisa khona, sithathe ilizwe liye phambili, sibe munye ngalesi sikhathi ”.

AmaElders ebeseZimbabwe ngemva kokunxunswa zinhlanganiso zokholo lwesiKhristu ukuthi azezama ukukhuthaza ukukhumisana umlotha phakathi kwabezombusazwe.

Ngaphandle kokuhlangana loMnangagwa, uChamisa, kanye labenhlanganiso ezizimeleyo, iqula leli lihlangane njalo labameli bakwamanye amazwe.

Udaba lwabadala beThe Elders siluphiwa nguMavis Gama
please wait

No media source currently available

0:00 0:03:55 0:00

Facebook Forum

XS
SM
MD
LG