Uzulu we Harare umanyene labanye ilizwe lonke ukunanza usuku lwamaqhawe azinikela impilo ukuyalwela inkululeko yeZimbabwe, olwe Heroes Day.
Ekhuluma embuthanweni weHarare uMongameli Emmerson Mnangagwa uveze ukuba lanxa uhulumende wakhe ezimisele ukulondoloza amalungelo oluntu akusisekelo sombuso lokho akutsho ukuba abantu sebengazenzela umathanda besephula awabanye.
UMnangagwa uthi okumqoka yikuba uzulu aqakathekise ilizwe lakhe asebenze njengebumba hatshi ukudonselana lodlakela ngoba lokho kungasakhi isizwe.
“Sizolondoloza amalungelo akusisekelo sombuso sinanzelela ukuthi lawo malungelo akusi asetshenziswa ngendlela engayisiyo.”
Umsekeli kampathintambo wezomvikela lendaba zabalwa impi yenkululeko umnumzana Victor Matemadanda uphathe udaba lwabeMDC ekhokhelwa ngumnumzana Nelson Chamisa lokuqoqa ukutshengisela mhla ka 16 Ncwabakazi ethi yikuzikhohlisa.
“Ilungelo lokutshengisela ngokuthula likhona kusisekelo sombuso, kodwa lokho akutsho ukuba kumele lisetshenziswe ngendlela engayisiyo. Ukukhuluma lokwenza ngokubili okutshiyeneyo. Akuyi kuba khona lokho kutshengisela. Bathi bona bazokwenza kodwa mina ngithi akuyi kwenzakala lokho.”
Kodwa isikhulumeli seMDC umnumzana Daniel Molokele uthi abakwenzayo yikulandela umthetho wona obavumela ukutshengisela njengokutshiwo yisisekelo sombuso.
“I High Court a few months ago inike i judgement etsho ukuthini, under i Public Order and Security Act, labo bantu abafuna ukutshengisela kumbe abafuna uku marcher, they can notify the police ukwenzela ukuthi amapholisa babone ukuthi kule law and order. I High Court yacaca ukuthi amapholisa lala lungelo lokumisa abantu abafuna ukutshengisela.”
U Molokele uthi kunje amalungiselelo okutshengisela kwamhla ka 16 Ncwabakazi sekukusibanga esiphezulu njalo akubuyelwa muva.
“Laba abanye abakhulumayo ukuthi mhlawumbe i demonstration izaba violent kumbe kuyini, ngabantu abazikhulumelayo abakufunayo. Thina into esimangalisayo yikuthi i Zanu Pf iyakhohlwa ukuthi layo ile lungelo yokuthini, i oganize eyayo i march kumbe i demonstration layo itshengisele ekufisayo. Kodwa bona ba bhizi ngento ze MDC, kutsho ukuthi bona vele ngabantu abayethukileyo ngoba bayakwazi, bazinuka amakhwapha, izazela zabo zabatshela ukuthi abantu beZimbabwe, kungaqala something abangasoze bakumela njenge Zanu Pf. Thina njenge MDC siqhubekela phambili ngamalungiselelo sizabona ukuthi kuyabe kulama marshals, kuyabe kulendlela zonke ezitshiyeneyo ukuthi i march yethu iqhubeke ngokuthula kungela violence.”
Umsekeli womkhokheli ehlangothini lwabasakhulayo kuZanu Pf, u Lewis Matutu uthi babalindele kulokho kutshengisela bezomelana labeMDC.
“Yiloba yini abazakuyitsho, sizakuma silinde umhla ka 16 njengoba eseseduze nje. Kabenze abakwenzayo thina lathi sizokukwenza okwethu ngendlela yethu ukulondoloza ilizwe ”.
Esekhuluma phezu kokuqakatheka kosuku lokunanza abalwa impi yenkululeko, u Matemadanda uthi akumelaga luhlonitshwe hatshi ngabe Zanu PF kuphela kodwa lozulu wonke weZimbabwe.
“Abantu bazinikela ukuthi banike impilo yabo ibe yi sacrifice eyokuthi likhululwe ilizwe leli. Abanengi bafa, bangcwatshwa endaweni ezazakalayo abanye abazakali kodwa bakwenza khonokhi befuna ukuthi ilizwe leli likhululeke. Yikho esikubongayo, yikho esikuthakazelelayo, yikho esikucabangayo kulanga lona leli, ukuthi amaqhawe bazinikela impilo yabo ukuthi ilizwe leli likhululeke and selikhululekile.”
Okhokhela iqembu lomculo wembube lako Bulawayo, eleIndonsakusa, Morning Star, u Osca Siziba ulandisa ngokuqakatheka kwalolusuku kuye njengosakhulayo.
“Usuku lwalamuhla lutsho okukhulu kimi njengomuntu osakhulayo, ngibona imbali lapho esivela khona lalapho esiya khona. So ke kithi kuqakathekile kakhulu ngoba sihlonipha abalwela ilizwe lethu ukuthi lathi sanelise ukuthi siziphilele njengabantu beZimbabwe.”
Umongameli Mnangagwa uthethe lelithuba ukunikeza izicoco kunkokheli enhlanganisweni ezitshiyeneyo kanye labaqhuba umsebenzi wokusiza uzulu ngesikhathi ehlelwe ludubo lwezulu lwesikhukhula e Chimanimani ekuqaleni kwawonalo umnyaka. Laba babalisa umnumzana Bishow Parajuli we United nations kuleli kubongwa ihlandla lakhe alidlalayo ekubuthaniseni usizo ngesikhathi elezimbabwe lehlelwe yingozi yezulu elaletha umonakalo omkhulu lemfa zabantu e Chimanimani.
Kubongwe njalo okhokhela iqula labammeli bakwamanye amazwe kuzwekazi le Africa engomele ele Democratic Republic of Congo eZimbabwe uAmbassador Mwana Nanga Mwana Wampanga.
Lomnikazi wenkampani kamakhalekhukhwini ye ECONET umnumzana Strive Masiyiwa laye utholiswe isicoco kubongwa umsebenzi owenziwa ngabohlangothi lwe Higher Life Foundation enkampanini le.
Uzulu uqhubeke elibaziswa ngengoma zokholo lezomdabu ebezihlatshelwa ngendimi ezehlukeneyo ebezivelela kumaqembu atshiyeneyo abalisa ele Police Band.
