Abekhomishini ebona ngezokulwisana lenkohlakalo eye Zimbabwe Anti – Corruption Commission ( ZACC ) baxwayisa abaphatheke kulumkhuba bazobotshwa kungakhathalekile ukuba ngabalezikhundla zaphezulu okunganani. Abe Commission le bathi inkohlakalo yiyo imbangela enkulu yezikhubek ezibhekane lokuthuthukiswa komnotho welizwe.
Emhlanganweni lentathelizindaba emahofisini alikhomishini, emzini we Mount Pleasant, eHarare, umgcinisihlalo wayo uCommissioner Justice Loice Matanda Moyo uthi selokhu baqalayo umsebenzi sebethole imibiko yendaba ezingamatshumi phose amane(38 cases) ezilitshumi zankona kungezabalezikhundla zaphezulu.
Uveze njalo ukuba sebeqalile njenge Commission ukuqhuba imisebenzi yenhlolisiso zalabo abakuzikhundla zaphezulu. Kunje sekulodaba olulodwa oselukhwezwe lwasiwa kwabehofisi yabatshutshisi bakahulumende eye National Prosecuting Authority.
Linkulumo isekelwe ngabasakhulayo bebandla le Zanu Pf bona abasanda kwembula amagama abanye balabo abaphatheke kumkhuba wenkohlakalo.
Umsekeli kanobhala ehlangothini lwabasakhulayo beZanu PF, uMabutho Moyo uchasisa ngohlelo lwabo lokuzama yokulondoloza umnotho welizwe. Upha isizatho sokuba kungani beqale ngokuveza inkokheli ebandleni labo le Zanu PF. Uthi ulethemba lokuba abezomthetho bazowuzwa umkhosi ohlatshwa ngabantu phezu kwaloludaba.
Kodwa abasakhulayo bebandla le MDC elikhokhelwa ngumnumzana Nelson Chamisa bathi bazoyicela isivuthiwe.
Unobhala kuloluhlangothi, u Ostalos Gift Siziba ulandisa kabanzi ngalowo mbono wabo. Uthi kulamaqembu ambalwa aphatheke kuzibanga ezehlukeneyo zomkhuba wenkohlakalo.
Kungakho esithi yena labanye bakhe uSiziba bazake balinde babone ukuba uvunguza usiya kuphi umoya lo wokulwisana lenkohlakalo okukhulunywa ngabe ZACC. U Siziba uthi akaboni esiba khona obotshwayo ngemva kokutholakala elomlandu ngabe ZACC.
Ingcwethi ecubungula ezombusazwe umnumzana Tjenesani Ntungakwa uthi akuqali namhla okukhulunywa ngumgcinisihlalo weZACC lequla lakhe.
Ulandisa ngakukhangeleleyo u Ntungakwa ukuba ngabe yikho okwenzakalayo hatshi ukube lokhe kusethuswa lokuxwayiswa abantu.
Abe ZACC bathi kunje sekulodaba lwenkokheli yenkampani kahulumende ye Zimbabwe National Roads Admnistration - ZINARA oselusemthethwandaba kuthi olwe NSSA lusahluzisiswa ngemva kokuthola imibiko yokungaqhutshwa kuhle komsebenzi kanye lenkohlakalo.
Kungakho besithi asikho isizatho sokubumba eyinye ikhomishini yokucubungula lezi ndaba eye National Commission of Inquiry ezamele ihluzisise indaba zenkohlakalo njengalokho okuke kwabethwa nguMongameli Emmerson Mnangagwa ngemva kokuvezwa kwenkokheli yeZanu Pf kwezenkohlakalo besithi lokho kungenziwa nxa kuyikuthi kuqondiswe kwabebandla.
