Amabandla ezombusazwe aphikisayo, akhankasela ukuguqulwa kwemithetho yokhetho, phansi komanyano we National Electoral Reform Agenda - NERA, abe lomhlangano wokulungiselela umkhosi wokufola, okhangelelwe ukuqhutshwa mhlaka 26 Ncwabakazi.
Inkokheli yalamabandla ithi, bazafola ngenjongo yokuyakwethula incwadi yezikhalazo, ipetition, befuna ludilizwe uhlangothi olubona ngezokhetho eyeZimbabwe Electoral Commission – ZEC, asuswe lomkhokheli wayo uJustice Rita Makarawu.
Unobhala jikelele webandla leAfrican Democratic Party engumgcinisihlalo wequla lababona ngezokuqhutshwa kwenhlelo zeNERA, umnumzana Joelson Mugari, utshele intathelizindaba ukuba, kuvunyelenwe emhlanganweni, owenzelwe esigodlweni seMDC-T eseHarvest House, ukuba bafole ngalolosuku, ukuyafuna impendulo yezinye zencwadi zezikhalazo aabazinikeza abe ZEC ngaphambilini.
Okunye okuvunyelenwe kulomhlangano, yikuba atshiye umsebenzi umgcinisihlalo wayo, uJustice Rita Makarau, ngoba ephethe izikhundla ezimbili ezimqoka elizweni, kuZEC laku Judiciary Commission.
Lokhu kwamukele ngendlela ezehlukeneyo nguzulu weHarare. Umnumzana Themba Ndlela isakhamuzi seHarare uthi uyalijabulela lelinyathelo elithathwa yinkokheli yeNERA.
Unkosazana Elina Mathe, ngomunye wabasakhulayo obekade engazihluphi ukuphatheka kukhetho sonke lesi sikhathi. Kodwa usekhuthaza abanjengaye, ukuba bayebhalisa, baphatheke ngobunengi kukhetho oluzayo, okuzanceda ukususa umbuso okhona manje.
Amabandla alitshumi lantathu abumba lumanyano weNERA athi asenanzelele ukuba ukhetho kuphela, kuyiyo indlela yokukhipha loba ukubeka inkokheli embusweni kungakho bethi kuqakathekile ukuba kusiyafika ukhetho luka 2018, isiyenziwe leyo nguquko abakhala ngayo.
Inkokheli emabandleni ezombusazwe aphikisayo, bathi bafisa ngaye isebenza izimele iZEC, yanelise ukuqhuba umsebenzi ngendlela, hatshi okwenzakala manye ukuthi amalunga ayo akhethwa nguhulumende bengabantu abaqhubekisela phambili izifiso zakhe.
