amalinks wokungena

Breaking News

Abenhlanganiso yeInspire Bapha Abadlali Benguqu Isipho Sezikhabiso Amashooters


Umgcinisihlalo wenhlanganiso ye Inspire Women, Men and Children uJoel Phambano Dube eqhubela isiphathamandla seqembu le Highlanders uNhlanhla Dube izikhabiso

Inhlanganiso ezimeleyo eye Inspire Women, Men and Children Trust idingele abadlali bomdlalo wenguqu abasedolobheni lako Bulawayo abalikhulu lamatshumi amahlanu izicathulo ezisetshenziswa ngabadlali balumdlalo, zohlobo lwama shooters.

Umqondisi wenhlelo zenhlanganiso ye Inspire uGift Samanyawe uthi inhloso yenhlanganiso le yikuphathisa abaswelayo edolobheni lako Bulawayo ikakhulu abasakhulayo okuyibona ikusasa yelizwe.

“Injongo yethu ngesipho lesi ngesokuba sisize abasakhulayo ukuba bethole okokwenza njengoba sisazi sonke ukuba inengi labantu kwele Zimbabwe kabaqhatshwanga. Nxa bengela ndlela zokuchitha isikhathi eziqondileyo basuka baphatheke ekugangeni,” kutsho uSamanyawe.

Amaqembu athole izikhabiso lezi ezivele kunhlanganiso ye Inspire ngabalisa amaqembu adlala kusigaba se Premier Soccer League athi ele Highlanders, ele Bulawayo City, ele Bulawayo Chiefs kanye lamanye amaqembu amancane.

Umgcinisihlalo wenhlanganiso ye Inspire uJoel Phambano Ndebele uthi amaqembu abawakhethileyo bawakhethe ngemva kokuxoxisana lenkokheli zezigaba.

“Sikhethe amaqembu kazulu athwele nzima njalo zikhona ezinye impahla ezisendleni ezizathi zingafika siziphe amanye njalo amaqembu angazange athole,” kutsho uNdebele.

Imidlalo yesigaba se Premier Soccer League ikhangelelwe ukuqala ngenyanga kaNkwenkwezi kuthi nxa konke kungahamba kuhle sekuqala lemidlalo yezigaba zangaphansi.

Inhlanganiso ye iInspire Women, Men and Children Trust yinhlanganiso ebunjwe yisizalwane selizwe le Zimbabwe uPatience Ndebele Omijie labanye bakhe elizweni lase Ngilandi.

Linhlanganiso iphathisa abaswelayo emazweni ambalwa njalo kwele Zimbabwe sebephathise umphakathi ngendlela ezitsheyeneyo ezigoqela ukugebha imigodi yamanzi, ukubhadalela abantwana imali yesikolo kanye lokupha izakhamizi ukudla.

Ezemidlalo siziphiwa nguJoseph Njanji
please wait

No media source currently available

0:00 0:01:41 0:00

Facebook Forum

XS
SM
MD
LG