amalinks wokungena

Breaking News

AbePremier Soccer League Sebekhweze Imbadalo Yokuyabukela Imidlalo Yenguqu


Castle Lager Premier Soccer League.

Iqembu lomdlalo wenguqu ele Highlanders lizadibana lele Yadah ngoMgqibelo kodwa abaqeqetshi balo bona sebevele sebecabanga ngomdlalo wabo leqembu le Dynamos kuviki eyetshumi lambili eyesigaba se Castle Lager Premier Soccer League.

Iqembu lenguqu eleHighlanders Football Club
Iqembu lenguqu eleHighlanders Football Club

Ekhuluma lentathelizindaba zemidlalo umqeqetshi weqembu le Highlanders uMadinda Ndlovu uthe kulabadlali bakhe asebatshengiswa ikhasi elilombala olithanga kabili emidlalweni eseyadlulayo njalo laba balakho ukubaphumuza bengaphatheki emdlalweni wabo leqembu le Yadah. UNdlovu uthe lokhu bazakwenza ngoba bebafuna laba badlali ukuba babe yingxenye yeqembu labo mhla bedlala leqembu le Dynamos.

"Akusikho ukuthi iqembu le Yadah siyalidelela kodwa lani liyakwazi ukuqakatheka komdlalo wethu leqembu le Dynamos.
Kulisiko okumele sililandele ukuba umdlalo wethu leqembu le Dynamos uvusa amadlabuzane yikho ke kumele iqembu lethu libe liqine saka ngalolosuku."

Abadlali abalakho ukuphunyuzwa nguMadinda labasekeli bakhe ngabagoqela umgadli uPrince Dube kanye labadlali benkabeni yenkundla uNqobizitha Masuku kanye lo Adrian Silla.

Kweminye imidlalo ezadlalwa kusasa ngoMgqibelo iqembu le Herentals lizemukela ele CAPS United ngase National Sports Stadium, iqembu le Chicken Inn lizadlala lele Harare City ngase Luveve, iqembu le ZPC Kariba lizadibana lele Chapungu ngase Nyamhunga kuth iqembu le Ngezi Platinum Stars lizangqikilana lele FC Platinum ngase Baobab.

NgeSonto iqembu le TelOne lizemukela ele Black Rhinos ngase Luveve, iqembu le Hwange lizadlala lele Triangle ngase Colliery, iqembu le Mushowani Stars lizadibana lele Bulawayo Chiefs ngase National Sports Stadium kuthi iqembu le Dynamos lizadlala lele Manica Diamonds ngase Rufaro.

Inhlanganiso yenguqu eyeCastle Lager Premier Soccer League.
Inhlanganiso yenguqu eyeCastle Lager Premier Soccer League.

Kusenjalo inhlanganiso ye Premier Soccer League isikhuphe umbiko owazisa abalandeli bomdlalo wenguqu ngokukhwezwa kwemali osekungenwa ngayo enkundleni.

Labo abafuna ukuhlala lapho okungela mthunzi khona kumele bayehlukane lamadola alitshumi awohlobo lwe RTGs, labo abafuna ukuhlala ku VIP kumele bayehlukane lamatshumi amabili amadola awohlobo lwe RTGs ikanti labo abafuna ukuhlala lapho okuhlala khona ingamula ku VVIP kumele bayehlukane lamadola angamatshumi amahlanu awohlobo lwe RTGs.

Kolunye udaba olumayelana lomdlalo wenguqu, iqembu elimela ilizwe le Zimbabwe elaziwa kakhulu ngegama elithi Warriors lizaphatheka kumidlalo emibili kusasa njengoba kuleqembu elizadlala umdlalo owokuzwana amandla lele Nigeria khonale kwele Nigeria kuthi elinye iqembu lizadlala umdlalo owokudinga iqembu elizaphutsha lisendaweni yesithathu kumncintiswano walonyaka owe Cosafa oqhutshelwa elizweni lase South Africa.
Iqembu elizadlala lele Nigeria libunjwa ngabadlali abamela ilizwe le Zimbabwe kumncintiswano owokudinga intshantshu zezwekazi lase Africa ozaqhutshelwa elizweni lase Gipite.

Kuqembu elizadlala kusasa kwele South Africa kulabadlali abane ababalisa uThabani Kamusoko, uElvis Chipezeze, uTafadzwa Kutinyu kanye lo Ronald Pfumbidzai abazalandela labo abase Nigeria lapho iqembu le Zimbabwe elizaqhubeka khona lisenza amalungiselelo alo phambilini kokuba libhekise amabombo kwele Gipite.

please wait

No media source currently available

0:00 0:02:44 0:00

Facebook Forum

XS
SM
MD
LG