amalinks wokungena

Breaking News

AbeSADC Banquma Ukuba Mhlaka 25 Mfumfu Bazatshengisela Besekela iZimbabwe Ukuthi Yesulelwe Izijeziso Zenotho


SADC

Inhlanganiso yamazwe engezansi yezwekazi le Africa eyeSouthern African Development Community SADC, inqume ukuba umhlaka 25 Mfumfu kubelilanga lapho amalunga azatshengisela esekela eleZimbabwe kunkuthazo yokuthi izijeziso zomnotho elazetheswa ngamazwe angentshonalanga zesulwe.

Lesi sinqumo sivunyelenwe emhlanganweni wayo oqhutshelwe kweleTanzania ngoNcwabakazi lonyaka. Umbuzo olabanengi ngothi kambe lezi zijeziso yizo na, ezibangela inhlupho ezibhekane leZimbabwe khathesi.

Ngokutsho kwenhlanganiso yezizwe zomhlaba eyeUnited Nations ikhansili yale inhlanganiso iSecurity Council ilemihlobo emibili yezijeziso zomnotho ezethulela ilizwe elephule imithetho evunyelwene ngamazwe omhlaba. Limithetho igoqela ukuhlonipha amalungelo oluntu, imithetho yelizwe kanye lentando kazulu.

Uhlobo lwakuqala yisijeziso esenqabela wonke amankampani akwamanye amazwe labantu bawo ukuthi baqhube inhlelo zamabhizimusi lamankampani elizwe elethulelwe izijeziso. Esesibili yisijeziso esenqabela amankampani akwamanye amazwe ukwenza ibhizimusi lamankampani athile elizwe elethulelwe isijeziso siphinde futhi senqabele labantu abathile ekwethekeleleni amazwe athile.

Ingcintshi yeZimbabwe kwezombusazwe umnumnzana Zenzo Moyo, uthi okwakhathesi iZimbabwe njengelizwe ayifakelwanga izijeziso zomnotho, amasanctions.

“Afakwe ebantwini abathize abakubandla elibusayo eleZanu PF. A affector ama individuals, abantu thizeni. Ibandla elibusayo eZimbabwe laselisebenzisa amasanctions njengepropaganda eyokuthi ngamasanctions lawa afakwe phambikwethu asikwazi ukuqhubekela phambili. Akusoqiniso lokho.”

Ngompalakazi ka1966, iZimbabwe eyayibizwa ngokuthi yiSouthern Rhodesia ngaleso sikhathi, yethulelwa izijesiso yi United Nations. Lezi zijeziso zazisenqabela amazwe lamankampani ukuthengiselana izikhali leZimbabwe ngemva kokuba amabhunu ayebusa iZimbabwe ethe awasalawulwa yiBritain asezibusa njalo awasoke avumele abantu beZimbabwe bazibuse.

Ngo 2002 inhlanganiso yamazwe aweEurope eye European Union (EU) yethulela iZimbabwe izijeziso zomnotho isethesa uhulumende kamnumnzana Robert Mugabe umlandu wokwephula amalungelo oluntu, ukuhlukumeza abamabandla aphikisayo labezindaba. Lezi zijeziso zenqabela ukuthengiselwa kweZimbabwe izikhali, zibuye njalo zenqabele amazwe alinhlanganiso lamankampani awo ukwemukela abantu abathile lokwenza ezamabhizimusi lamankampani alesandla ekwephulweni kwamalungelo.

Lezi zijeziso zivuselelwe ngo 2004 zaphinda futhi zavuselelwa ngo 2011. Ngohlolanja lonyaka iEU, ithe zizaqhubeka lezi izijeziso kuze kube ngomnyaka ozayo ngoba isithi kusasekhona ukwephulwa kwamalungelo oluntu phansi kombuso kaMongameli Emmerson Mnangagwa.

Unobhala jikelelele webandla leZimbabwe Communist Party umnumnzana Ngqabutho Mabhena, uthi lobanje bengasekeli ukuthi iZimbabwe yethulelwe izijeziso, iqiniso yikuthi ubusela lenkohlakalo yikho imbangela yokuwa komnotho weZimbabwe hatshi izijeziso ezethulwe yi EU.

“Nxa kuyikuthi yiwona amasanctions enza ukuthi umnotho utshabalale, ngabe indlu kaRobert Mugabe esiyazi lamhlanje ngokuthi yi Blue Roof ngabe vele kayikho. UEmmerson Mnangagwa uhamba ngendizamtshina elombheda phakathi, elezinto ezimantofontofo. Ngabe singaphansi kwamasanctions ngabe akahambi ngobuntofontofo lobu ahamba ngabo imihla ngemihla.”

IMelika layo ngenye eyethulela iZimbabwe izijeziso zomnotho ezifana leze EU ngo 2003. Lazoke bezilokhu zivuselelwa kantike ngoMbimbitho lonyaka umongameli Donald Trump uthe zizaqhubekela phambili okomnyaka.

Umeli weMelika eZimbabwe umnumnzana Brian Nicholas utshele iStudio ekuqgitshweni komnyaka ophelileyo ukuthi lezi zijeziso zizahlala kuze kuphele ukwephulwa kwamalungelo oluntu eZimbabwe lokungahlonitshwa komthetho.

“Uhlobo lwakuqala yizijeziso ezenqabela abantu abathile ukuthi kube khona abakutholayo Emelika kanye lokubavimba ukuyakhona.”

Nyakenye iMelika yethule olunye uhlobo lwezijeziso phansi komthetho weZimbabwe Democracy and Economic Recovery Ammendment Act of 2018 (ZIDERA). Umnumnzana Nicholas uthi lalaphake kukhona okufuze kwenziwe yiZimbabwe ukuze lumthetho wesulwe.

“Umthetho weZIDERA uzakhitshwa kuphela nxa uhuluemde weZimbabwe angalandela yonke imithetho ekusisekelo sombuso esibhalwe ngo 2013.”

Ingcitshi kwezombusazwe zithi okufanele ukuthi aluba iSADC iyakwenza yikudingisisa ukuthi khuni bani olungathezwayo oluthezwe yiZimbabwe yaze yazithola isizokhele amalahle angaka ekhanda.

please wait

No media source currently available

0:00 0:04:42 0:00

Facebook Forum

XS
SM
MD
LG