Abantu beZimbabwe kungakhathalekile ukuthi ngabesilisa loba ngabesifazana sebehlala bengabatshengiselayo beveza ukukhonona kwabo ngokwenzakala elizweni kwezenotho lakwezombusa besithi sebekhathele.
Kodwa udubo osolukhona yikuthi lapho amapholisa ezama ukuchitha ukutshengisela lokhu aba locuku lokubhaxhabula abantu bebalimaza kakubi abanye bacine bethwalelwa ezibhedlela.
Abesifazane kabasahlonitshwa njengabomama okwenza ukuthi amapholisa ababhaxabule njengabesilisa.
Ngeviki edluleyo kuze kwatshaywa omunye usalukazi walanyulelwa ngabanye abebandla leMDC-T imifanekiso yagcwala enkundleni zebulenjini. Kambe lokhu kungabaqeda idlabuzane na abesifazane ukuphatheka ekushengiseleni lokhu?
Ukuhlaziya loludaba sixoxe lomqondisi wenhlanganiso elwela ilungelo loluntu, eye Zimbabwe Peace Project, uNkosazana Jestina Mukoko, othi umuntu wonke usekhathele eZimbabwe ikakhulu omama asebesithi okungasi kufa yikuphi.
"Okwenzakalayo khathesi yikuthi imuli yeZimbabawe abantu abanengi babhekane lobunzima empilweni zabo. Nxa ubunzima lobu butholakala endlini bubamba umama kakhulu. Esesikubona khathesi yikuthi umama usezitshela ukuthi angazahlale endlini konke yikufa, whether uyahlala endlini kumbe uyaphuma ayetshengisela labanye konke kuyafana".
