amalinks wokungena

Breaking News

Abesifazana Bakhuthazwa Ukuthola Imfundiso Ngolwazi lweICT


Women ICT
Women ICT
Ingcwethi kwezemfundo yaphezulu zikhuthaza abesifazana ukuba badinge imfundiso phezu kokusetshenziswa kwendlela zokhulumisana zangalezi nsuku eze Information Communication Technology ( ICT ) bethi inhlolisiso ezinengi ziveza ukuba balutshwana umhlaba wonke jikelele abalolwazi kulolu hlangothi.

Inhlanganiso ezilwela ilungelo labesifazane okubalisa eye Women Resource Centre and Network bona sebesungule inhlelo zokutholisa abesifazane kungakhathalekile ukuba badala okunganani,ulwazi phezu kokusebenzisa imitshina yakulezinsuku kundaba zokukhulumisana ngendlela yokubathuthukisa.

Abesifazane abaphutshe izifundo kundaba yokusetshenziswa kwemitshina yakulezi nsuku eziqhutshwe ngabenhlanganiso yeZWRCN ngomnyaka ka 2011 lanyakenye, babuthene bejabulela ukutholiswa izithupha emkhosini owenzelwe eCelebration Centre eHarare ngoLwesihlanu.

Omunye wamalunga eBoard enhlanganisweni yeZWRCN u Dr Jessiman Chipika uthi indlela zakulenzi nsuku kwezokukhulumisana ziphathisa ukuthuthukisa isizwe ngakho kuqakathekile ukuba abesifazane labo baphatheke ngokugcweleyo.

Lezi zifundo eziqhutshwe ngabe ZWRCN ngaphansi kwesihloko esithi, “Making a difference for women, we are made for women ”, zenziwa kungela mbadalo njalo ziqondiswe kulabo abangelalwazi labalolwazi olulutshwana kundaba zokusetshenziswa kweICT kuveze u Dr Chipika.

U Dr Elizabeth Chikwiri okhokhela uhlangothi olubona ngendaba zezifundi eolitshini le Women’s University in Africa, obengumhlonitshwa kulomkhosi wokutholiswa kwezicoco kwabesifazane abalikhulu phose lengxenye-148, abaphutshe izifundo zeICT, uncome loluhlelo oluqhutshwa ngabe ZWRCN.

Omunye wabatholiswe wabaphutshe lezi zifundo ze ICT ngunkosikazi Felistus Muswe olengane ezine njalo engumqondisi wesikolo sabantwana abancane i-Pre – school, utshele uzulu ukuba ubengomunye wabesifazane abekade besesaba ukufika duzane le computer.

Kuthi unkosikazi Clara Nkomo wasemzini weTafara,oleminyaka engamatshumi amabili lasitshiyagalolunye -29, njalo engophila ngokuzenzela eseluka inwele, uthi uncedakele kakhulu ngaloluhlelo ngoba selumphathisa khakhulu ngesikhathi eqhuba umsebenzi wakhe.

Kuthi obona ngezokukhulumisana lozulu enhlanganisweni ye ZWRCN, unkosikazi Buhlebenkosi Moyo uthi lumcabango wokuqhuba inhlelo zokutholisa abesifazane ulwazi phezu kwemitshina yama computer leminye imitshina yakulezi nsuku, uze ngemva kokunanzelela ukuba balutshwana abalalo.

Abe ZWRCN baveza ukuba luqale eHarare loluhlelo njalo lukhangelele ukuba luzaqhela lusabalale ilizwe lonke nxa ithe yatholakala imali yokwenza njalo.

Bathi lonyaka abasanelisanga ukuluqhuba loluhlelo olusungulwe ngomnyaka ka 2011,ngoba beswele imali yokwenza lokho lanxa isifiso besikhona.
XS
SM
MD
LG