Umkhulu umsebenzi osuwenziwe ngabesifazane kwezemidlalo eminyakeni engamatshumi amane ilizwe le Zimbabwe lithole uzibuse.
Iizwe leZimbabwe lilemendulo eziyithoba minwe mbili elazithola emidlalolweni yamaOlympics selokhu laqala ukuphatheka kulimidlalo ngomnyaka ka 1980 njalo zonke lezimendulo zitholwe ngabesifazane.
Iqembu lomdlalo wehockey elaziwa ngegama elithi Golden Girls yilo elithole imendulo yakuqala ngomnyaka ilizwe elithole ngawo uzibuse ngo 1980 lapho elithole khona imendulo yegolide kumidlalo eyaqhutshelwa elizweni le Soviet Union.
Intathelizindaba yezemidlalo uThandiwe Moyo uthi iqembu lama Golden Girls yilo elaba ngamavulandlela avulela omama ukuba babizwe besabele kwezemidlalo.
“Omama sebeyenze kuhle kakhulu kwezemidlalo. Nxa ukhangela ama Golden Girls ngo 1980 wehle usiza ngapha ukhangela amaqembu afana le Mighty Warriors ube usukhangela lo Kirsty Coventry.
Banengi abesifazane asebeyenze kuhle kwezemidlalo lanyakenye lokhu amankazana adlala ibhola lokuqaga bahambe bayasimela kuhle emazweni siyi Zimbabwe okutshengisela ukuthilathi sikhona kwezemidlalo,” kutsho uNkosazana Moyo.
Iqembu lama Mighty Warriors libe liqembu lomdlalo wenguqu elakuqala ukufinyelela ukuyaphatheka kumidlalo yama Olympics ngomnyaka ka 2016.
Umqeqetshi waleliqembu uSithethelelwe Kwinji 15 Sibanda wayengumsekeli kamqeqetshi uShadreck Mlauzi ngalesosikhathi njalo uthi kuyinto enhle ukuba iqembu lakhe lalo libalelwa kwabesifazane abaphakamise ilizwe le Zimbabwe kwezemidlalo.
“Emidlalweni lapha banengi abesifazane asebeyenze kuhle kuminyaka leyi engamatshumi amane eyedluleyo.
Kukhona abo Cara Black owe tennis, kulama Gems we netball. Ngingakhohlwa lelami iqembu ama Mighty Warriors, labo benze kuhle kakhulu bedlala imidlalo yezinga laphezulu.
Siyakuthakazelela ukuba bakhona abesifazane asebenze ilizwe lethu libonakale phambi kwamanye amazwe,” kutsho uNkosazana Sibanda.
UCara Black ube yintshantshu eyomdlalo we tennis odlalwa ngabadlali ababili njalo uthole izicoco ezilitshumi edlala kumncintiswano yama Grand Slams.
Umphathintambo wogatsha lwezabatsha, ezemidlalo lokuzilibazisa uKirsty Coventry utholele ilizwe le Zimbabwe imendulo eziyisikhombisa kumidlalo ye Olympics njalo nguye umdlali ophuma kuzwekazi lase Africa ophethe imendulo ezinengi ezithola kumidlalo ye Olympics.
Olandela ezemidlalo uS’dani Dlodlo uthi uCoventry kumele alwele ukuba abesifazane baphiwe amathuba afana lawabesilisa ngoba imbali yezemidlalo kwele Zimbabwe iveza ukuba baqhuba kuhle kakhulu.
“Kuyadanisa ukuthi abesifazane abatholi usekelo olwaneleyo oluvela kuhulumende loba nje beqhuba ngcono kwezemidlalo kulabesilisa. Sithemba lokhu kuzalungisiswa njengoba silomphathintambo obengumdlali laye,” kutsho uNkosazana Dlodlo.
Amaqembu abesifazane amela ilizwe kumidlalo etshiyeneyo awatholi usekelo olufana lalolo olutholwa ngabesilisa njalo nyakenye iqembu le Mighty Warriors lize lakhalala ukudlala lele Zambia emdlalweni owokudinga amaqembu azakuyadlala kumidlalo ye Olympics ezaqhutshelwa kwele Japan.
Lokhu kwenzakale ngemva kokuba kube lomdlali olimeleyo leliqembu lize liyedlala kwele Zambia wangatholi sizo oluvela kunhlanganiso ye Zimbabwe Football Association.
Leqembu lama Gems lalo liqhube nzima phambilini kokuyaphatheka kwalo kumidlalo yezizwe zomhlaba kwele Ngilandi njalo licine litshengisela selikhalala ukuzilolonga selikhonangale ngoba izithembiso ebeliziphiwe zingasafezwanga.
