Abenhlanganiso eququzela amalungelo oluntu eyeWomen of Zimbabwe Arise-WOZA, base incwadi yezikhalazo, emahofisini ogatsha lwezemfundo ngolweSihlanu, bekhala ngemali ezihlawuliswa ezikolo, besithi bazokuma ukuzihlawula. Ukutshengisela kweHarare, kuza ngemva kwakoBulawayo, ngolweSine.
Omunye wabakhokheli beWOZA, uNkosikazi Jenni Williams, uthi bafuna zisuswe inhlawulo zesikolo.
U- Williams ethi abakwenzileyo ngolweSihlanu, yikukhumbuza uhulumende ukuba kungumlandu wakhe, ukutholisa abantwana imfundo ngoba kulilungelo labo phansi kwesisekelo sombuso.
AbeWOZA bathi makungabi lomzali ohlawula imali yesikolo mhlazivulwa, uhulumende aze akhulumisane labazali aphawule ukuba bengasahlawuli imali yesikolo.
Bacela njalo ukuba uhulumende engeze imali yebudget kuhlangothi lwezemfundo.
Lokhu kufola kwenziwe ngokuthula, kungela zehlakalo zokutshaywa lokuhlukumezwa kwabantu njengalokho okwenziwa ngamapholisa ekutshengiseleni okwenziwe ngabamanye amaqembu anjenge awomkhankaso weTajamuka/Sesijikile izolo eHarare lamanye.
Abekhona sibili amapholisa abeWOZA betshengisela, ebabukele kodwa engabaphazamisi njengalokho ahlezi ekwenza.
