amalinks wokungena

Breaking News

Abezemidlalo Bakhuthazwa Ukuba Bajove iJekiseni Yokuvikela iCovid – 19


Covid 19 Vaccine.
Covid 19 Vaccine.

Abenhlanganiso yabaqeqetshi bomdlalo wenguqu eye Zimbabwe Soccer Coaches Association bakhuthaza bonke abaphathelane lalumdlalo ukuba behlatshwe ijekiseni eyokuzivikela emkhuhlaneni we Covid - 19 ukuze ezemidlalo zivunyelwe elizweni.

Iziphathamandla ze Zimbabwe Soccer Coaches Association(Zisca), emhlubulweni wako Bulawayo zibe lomhlangano leziphathamandla zenhlanganiso ebona ngokuqhutshwa kwezemidlalo elizweni eye Sport and Recreation Commission ensukwini ezedluleyo zidinga ukuchasiselwa ngokuphenduka kwezemidlalo zona ezimiswe ngenxa yomkhuhlane we Covid – 19.

Unobhala jikelele wenhlanganiso ye Zisca ko Bulawayo uMorris Mukwiti uthi abaphume lakho emhlanganweni lo yikuba kumele abantu bonke bahlabe ijekiseni eyokuzivikela emkhuhlaneni we Covid – 19 ukuze kwehle inani labantu ababanjwa ngumkhuhlane lo.

“Thina njengabaqeqetshi bomdlalo webhola sikhuthaza bonke abadlali bomdlalo wenguqu ukuba kabahambe bayehlatshwa ukuze umkhuhlane ungamametheki ukuze siphange sibuyele ebholeni.

Sikhuthaza wonke umuntu, abadlali, abaqeqetshi labo bonke abathanda ibhola. Kuqakathekile lokhu,” kutsho uMukwiti.

Linkuthazo evela kunhlanganiso ye Zisca iza ngemva kokuba inhlanganiso ye Premier Soccer League ilaye amaqembu adlala kusigaba saphezulu ukuba kuthi kufika ngoLwesibili mhla zintathu kunyanga kaNcwabakazi abe esehlabise abadlali lenkokheli njengengxenye yemizamo eyokuba amaqembu abuyele enkundleni.

Nxa ingathola imvumo inhlanganiso ye PSL ikhangelele ukuba iqedise imidlalo yenkezo yeChibuku yona eyamiswa iphakathi laphakathi, iphinde njalo iqhube imidlalo yeligi.

Imidlalo yeligi icine ukudlalwa kwele Zimbabwe ngomnyaka ka 2019 njalo nyakenye kwehlule ukuba idlalwe.

Ukungabi khona kwemidlalo yeligi ngesinye isizatho esiphiwe ngumqeqetshi weqembu lesizwe uZdravko Logarusic njengembangela eyokuba iqembu lama Warriors lingaqhubi kuhle kumncintiswano we Chan kanye lowe COSAFA.

XS
SM
MD
LG