Ngesikhathi liqala ikhefu lephasika, abanye abeZimbabwe abahlala kweleBotswana abahambanga ekhaya besithi babone kungcono ukuthi bathumele imali ukuze iphathise abemuli lapho intengo yemphahla lokudla iqhubeka iqonga.
Ngenjwayelo, ikhefu lePhasika livame ukubona inengi labeZimbabwe elisebenza phandle kwelizwe liphindela ekhaya ngobunengi, ukuyahlangana lezihlobo labangane kodwa akunjalo lonyaka. Kulomehluko omkhulu, noma nje kulabanye abaphakamileyo besuka eGaborone besiya ekhaya, inani labo kade liphansi kakhulu nxa kuqhathaniswa leminye iminyaka ngekhefu linye.
Esilindweni samabhasi edolobheni leGaborone, amabhasi ahambela eZimbabwe kade engagcwalanga kangako, kungaphithizeli.
Omunye oweZimbabwe ohlala eGaborone, umnunzana Eric Madlala uthi yena ubone kungcono ukuthi azothumela imali ekhaya, hatshi ukuhamba yena ngokwakhe.
“Into zinzima ekhaya, ukuyakhona akuphathisi ngoba ngiza sebenzisa imali enengi, ngakho ngibone kungcono ukuthi ngithumele imali ukuze ibaphathise.”
Unkosikazi Emily Dube uthi iPhasika yalonyaka ifike bengakaholi emsebenzini, okwenze ukuthi kubenzima ukuthi bahambe ekhaya.
“Isifiso besikhona kodwa imali ayikho. Lesi yisikhathi sokuthi ngabe siyehlangana lezihlobo labangane ekhaya. Asithole amathuba amanengi ngenxa yokubambeka emsebenzini.”
Kodwa noma nje abanye bengahambanga ekhaya, kulabanenganyana abachaphe umngcele besiyabona izihlobo labangane.
Umnzana Andreas Sibanda ungomunye ophumayo esiyakoBulawayo, esithi angake akhutha ithuba lokuyafika ekhaya.
“Ikhefu lephasika lisinika isikhathi sokuthi siyelunguza ekhaya. Elinye ithuba lifika ekupheleni komnyaka, ngakho njengoba silamalanga amanengi okuphumula ngephasika, ngibone kungcono ukuyafika ekhaya.”
Abanye njalo abafana lonkosazana Samukeliso Dube bathi lesi yisikhathi sokuya enkozweni, njengokutsho komlayezo wePhasika.
“Iphasika lithuba lokuthi thina njengamaKristu sivuselele inkolo yethu, ngakho mina ngizabe ngisenkozweni.”
Kusenjalo, uhulumende weBotswana ubike ukuthi umngcele weRamokgwebana le Plumtree kawusoke uvalwe ukuze abantu bedlule kungela okungabavimbela.
