Inhlanganiso ebona ngezabaphuma emazweni abo omdabu besiyahlala kwamanye amazwe, eye International Organisation for Migration i I-O-M yethule umbiko ngolweSine oveza ubugqili izizalwane zeZimbabwe ezingena kibo kwele South Africa nxa zithe zabalekela uhlupho eZimbabwe.
Umbiko lo uveza njalo ukuthwalwa kwabantu besuswa kweleZimbabwe bethenjiswe izulu lomhlaba, kodwa kuthi dlwe, sokule, umuntu esezibona esephakathi kohlupho.
I I-O-M ithi izizalwane zeZimbabwe sezifike eSouth Africa zisetshenziswa emisebenzini yokuthengisa imizimba yabo, ukuthengisa okudakayo, eminye imisebenzi enzima, njalo ziholiswa imali encinyane, enengi isiya kulabo abazingenisa kwele South Africa okuthiwa ngama syndicates.
UNkosazana Annah Moyo ligqwetha elilwela ilungelo loluntu. UNkosazana Moyo ukhuthaza izizalwane zeZimbabwe ezingena kwele South Africa ukuthi ziqaphele labo abangazithembisa ize.
