AbeZimbabwe kweleBotswana abathumela imali besenzisa indlela ezifana labo Western Union bakhala ngokuthumela imali ethatha isikhathi eside ukufika kuzihlobo ngenxa yokusweleka kwemali ekhaya.
Abathumela imali kweleZimbabwe beseBotswana sebekhuthaze inkokeli yelizwe ukuthi ilungise udaba lokusilela kwemali elizweni.
Ukuswelakala kwemali sekubone inengi eliphandle kwelizwe lithumela imali ngendlela ezifana leWestern Union leMoneygram kodwa kuthatha izihlobo labangane isibanga eside ukuthi bathole le mali.
Unkosikazi Sinothado Sibanda uthi yena uvame ukusebenzisa iWestern Union kumbe iMoney Gram kodwa kulezinsuku uthola ukukhonona kuzihlobo ezithi ziyaphuza ukuthola imali. Imali ethunyelwa ngalendlela kumele ithathe imizuzu elitshumi kuphela ukuthi umuntu ayithole eZimbabwe kodwa isithatha amalanga...
"Kuyadanisa ngoba imali le uyithumela ukhangele ukuthi bayithole ngesikhathi kumbe ngokuphazima kweso. Kulesizatho sisebenzisa oWestern Union ngoba bathembekile kodwa uma kunje kusilahlisa amathemba."
Uqhubeke esithi sebezama abamabhasi kumbe omalayitsha noma nje lezi kuzindlela ezingathembakalanga njalo zidula....
"Sesikhangelele kwabamabhasi labo malayitsha kodwa akuthembakalanga njalo sebedula. Uhulumende kumele akhangele udaba lokuswelakala kwemali."
Abezomnotho bathi ukungangeni kuhle kwemali ethunyelwa ivela phandle kwelizwe ilakho ukulimaza umnotho ngoba imali le ilidwala lomnotho ofuna imali yaphandle kwelizwe...
"Uhulumende kumele alusinge lokhu ngokutshetsha ngoba kumisa ukungena kwemali evela ngaphandle eqakathekileyo ukuvuselela umnotho. Kumele sibe sesikusigaba sokusebenzisa imali kungelaphepha phakathi esithi ngesingisi yipaperless society."
EleBotswana lilenani eliphezulu, lilandela kuphela eleSouth Africa kuzwekazi leAfrica, elithumela imali eZimbabwe. Umphathintambo wesikhwama semali eZimbabwe, umnunanzana Patrick Chinamasa wabika esikhathini esidluleyo ukuthi imali evela ngaphandle kwelizwe ifika ibhiliyoni lamadola ngomnyaka.
