amalinks wokungena

Breaking News

AbeZimbabwe Council of Churches Baqoqa Umhlangano Lenkokheli Yezombusazwe


Rev Dr Kenneth Mtata

Ingcwethi ezicubungula ezombusazwe zincoma inyathelo eselithethwe ngabezokholo benhlanganiso yeZimbabwe Council of Churches – ZCC, lokuqoqa umhlangano phakathi kwamaBishop lenkokheli yamabandla ezombusazwe atshiyeneyo elizweni, wokubonisana ngokungenziwa ukuqeda inkinga ezibhekane lelizwe.

Lumhlangano uza ngaphambilini kwesehlakalo sokutshengisela esiqoqwa ukwenziwa ngabantu mhla ka 31 Ntulikazi ngenjongo yokwazisa uhulumende ukuba uzulu usekhathele ngenkohlakalo eselizweni, ngakhoke ufuna athathe amanyathelo aqinileyo okuqeda limpehlane.

Abe ZCC bathi amalungiselelo alumhlangano, wamaBishop amabandla okholo lwesiKhristu lenkokheli yamabandla ezombusazwe okhangelelwe ukwenziwa ngoMvulo ozayo mhla ka 13 Ntulikazi, e Kentucky Hotel, eHarare asekusibanga esiphezulu.

Unobhala jikelele we ZCC umfundisi Kenneth Mtata ulandisa kabanzi ngamalungiselelo abo alumhlangano.

“Yebo, uzoba khona umhlangano wabakhokheli bamabandla, ama Bishops behlangana lalabo abahola ezombusazwe ama political parties lapha e Kentucky eZimbabwe Council of Churches mhla ka 13 July 2020 bekhulumisana ngendaba lezo lenhlupho ezibhekane leZimbabwe. Se khomfemile ama Political Parties amanengi. Kusakhulunywa njalo ukuthi umhlangano lowo uzohamba njani. Ama Bilateral Pre-Meeting asaqhubeka kodwa lowo mhlangano uzoqhubekela phambili mhla ka 13 July 2020."

Ingcwethi kwezokukhulumisana ngezombusazwe, umnumzana Dumisani Nkomo, uthi linyathelo elincomekayo elithathwa yinkokheli yokholo lwesiKhristu.

“Kuyadingakala ukubana amaZimbabwe bekhulumisane. Kuyadingakala ukubana njengamaZimbabwe sidinge indlela esingalungisa ngayo ingxake ekhona elizweni lethu. Okuqakathekileyo yikuthi sinanzelele ukuthi inkinga yeZimbabwe ayisoze ilungiseke kalula lula, kuzathatha isikhathi. Kuzadingakala ukubana abantu sibili badinge indlela abangathola ngayo amaqhinga lamacebo okulungisa inkinga ekhona eZimbabwe.”

Emizameni esithe yenziwa ngaphambilini bebengabuyi emihlanganweni enje ababili abayibo abakhokhela amabandla amakhulu elizweni, umnumzana Nelson Chamisa we MDC Alliance loweZanu PF, uMongameli Emmerson Mnangagwa, kusiya ngokuthi ngubani obabizileyo. Abohlangothi lwezokukhulumisana lozulu ku MDC Alliance batshele intathelizindaba ukuba sebeyitholile incwadi yokubanxunsa kulowo mhlangano basamele impendulo evela kunhlangothi zonke zebandla.

Kuthi abohlangothi lunye ebandleni le Zanu PF bona baveze ukuba bazakukuhluza okumunyethwe yiyo lapho sebeyitholile, okwamanje kungekho abangakhuluma ngakho phezu kwalo mhlangano.

Isiminengi imizamo esithe yenziwa ngabenhlangothi zenkolo ezehlukeneyo kakhulukazi olwesiKhristu ukubaletha ndawonye abezombusazwe ukuthi baxoxisane ukudinga indlela zokuxazulula inkinga ilizwe elibhekane lazo kwezombusazwe abathi seziphazamisa ezomnotho.

Ezinye ingcwethi ezicubungula ezombusazwe zisithi lanamhla lokhu akukabi lempumela ebambekayo ngale mizamo eyenziwa kusukela ngesikhathi sombuso kamuyi owayengumongameli Robert Mugabe, ngakhoke loba ibukeka imizamo yabeZCC, bazoyicela isivuthiwe.

Facebook Forum

XS
SM
MD
LG