amalinks wokungena

Breaking News

AbeZimbabwe Passenger Association Bakhathazekile Ngokuziphatha Kwezihambi Zamabhasi


Abantu bemelele amabhasi aweZUPCO

Abenhlanganiso elwela ilungelo lezihambi eye Zimbabwe Passenger Association – PAZ, baveza ukukhathazeka okukhulu ngendlela uzulu ohamba ngamabhasi asebenzisana labenkampani eyeZUPCO aseziphatha ngayo, engasazihluphi ukugqoka ama mask ngendlela eyiyo ngesikhathi inani labatholakala belalomkhuhlane weCOVID - 19 liqhubeka liqonga ilizwe selibhekane lehlandla lesibili lokuqonga kwenani
lasebetholakala beleCoronavirus.

Lesi sixwayiso basenza ngemva kokunanzelela ukuba abantu abasazihluphi ukugqoka kuhle ama mask okuzivikela ekuthelelweni iCOVID-19 wona okhanya usuvuka ngolaka kuhlandla lesibili sokuqhamuka kwaleligcikwane emazweni womhlaba ikakhulu lawo athuthukileyo.

EleZimbabwe lalo liqhubeka lisiba lenani labatholakala belalomkhuhlane njalo kungabangazange bavakatshele kwamanye amazwe.

Okhokhela inhlanganiso ye PAZ umnumzana Tafadzwa George Goliati ulandisa ngasebekunanzelela kumkhuba wokuyekethisa ekugqokweni kwama mask.

"Abantu siyakhohlwa ukuthi usasekhona lumkhuhlane. Kabasafuni ukuwagqoka lawo ma mask ukuzivikela ekuthini ungaze wamemetheka lumkhuhlane."

Ingcwethi kwezempilakahle zithi kuyingozi enkulu osekusenziwa ngabantu ukungawagqoki ngendlela ama mask. Eyinye yalezi ngcwethi nguDokotela
Garry Shava okhumbuza uzulu ngokuqakatheka kokulandela iziqondiso
zikahulumende zokuvimba ukumemetheka kweCOVID-19.

"Oyabe egqoke i mask nguye okhangelwa sekungathi nguye owenze okungekho kuhle. Kodwa nxa sikhangele sibili sizananzelela ukubana usungezelela, ngokunjalo sesizifake engozini, ukubana yonke le imizamo isizakulahleka nje ngoba abantu kabazange baqinisele."

Okusekelwe ngomunye osewasinda kulo umkhuhlane umnumzana Thoko Sibindi.

"Okunye okuqakathekileyo nje yikuthi umuntu edle ukudla okwakha umzimba, ungadla kabili kathathu kumbe kane, kodwa kube yikudla okwakha umzimba. Ubone ukuthi isikhathi esinengi uhlala usuthi ube ulamanzi oyabe uwanatha, engaba ngamanzi akhudumalayo, oyabe ulokhe uwacabula nje, uwacabula. Wonalawo oyabe uwafake into ezinje ngabo lemon phakathi."

Umongameli Emmerson Mnangagwa uthi lanxa bebanengi asebesinde kulo
mkhuhlane sisakhona isidingo sokuba abantu bangayekethisi kwezokulandela iziqondiso ezabekwa nguhulumende wakhe zokuzivikela ukuthi umuntu engathelelwa lumkhuhlane njalo angatheleli abanye nxa engafunyanwa elawo.

Embikweni owethulwa nsuku zonke abogatsha lwezempilakahle bathi ngokutshona kwelanga layizolo, bebesebezinkulungwane eziphose zifike eziyisificamunwe munye – 8,696 asebetholakale beleCovid 19, eZimbabwe lakho laqhamuka ngoMbimbitho lonyaka.

Sebefika phose amakhulu amathathu - 255 asebelahlekelwe yimpilo ngemva kokuhlaselwa ngumkhuhlane lo, kodwa kwasila abazinkulungwane ezedlula
eziyisificaminwe mibili-8,060.

Facebook Forum

XS
SM
MD
LG