Kuhlelo lwethu Liphuma Lendaba Litshona Lendaba sihlaziya udaba lwabezokholo kudaba lwezombusazwe. Lokhu kulandela ukwethula ugwalo lwezikhalazo ezivunyelwane ngemva komhlangano owenzwe yinhlanganiso zokholo ezimbalwa ngoLwesibili.
Izikhalazo lezi zonke ngeziphathelane lomnotho welizwe lokulondolozwa kwelungelo loluntu kulandela ukutshengisela okwenziwa ngeviki edluleyo lapho okutshaywe khona abantu kwabotshwa abanengi.
Sixoxa lesikhulumeli senhlanganiso ye Christian Alliance, umfundisi Useni Sibanda obekhona emhlanganweni.
Kutsho uSibanda: "Amabandla agoqela iEFZ, Zimbabwe Council Of Churches, Catholic Bishops Conference le UDASIZA emele ama apostolics lama Zionist churches kodwa njalo lenhlanganiso ezisebenza phansi kwamabandla ezifana labo Christian Alliance labo Habakuk Trust yibo abahlangeneyo."
USibanda uthe bazahluza izikhalazo lezi babone ukuthi bengazisa njani kumongameli Mugabe lohulumende wakhe.
