amalinks wokungena

Breaking News

Abongi eZimbabwe Bakhala Ngokuthi Iholo Abalengezelelweyo Kaleneli


Abongi betshengisela koBulawayo

Abongi beZimbabwe abasebenzela uhulumende bathi imali engezelelwe ngumqatshi incane kakhulu ngakho abayamukeli bethi kumele azame ukubahlawula ingxenye yeholo labo ngedola leMelika.

Abongi bathi laloba bengayemukeli imali abayithenjiswe ngumqatshi besithi kayeneli lutho, bazaqhubeka besemsebenzini uhulumende esakhangelisisa njalo izikhalazo zabo ezeholo kanye lezemphahla yokuzivikela kuCovid 19 lokunye.

Umnunzana Anthony Majongosi umngcinisihlalo weZimbabwe Nurses Association, e-United Bulawayo Hospital uthi basakhulumisana loHulumende ukuthi kwenziweni.

“Sivumelane legovernment ukuthi sibuyele emsebenzini ukuthi izakhangela izikhalazo zethu, khathesi isinike I offer ukuthi iza sinika imali ekwanayo but siyabona ukuthi imali leyi ayikwani lutho asikwanisi ukuthi siphile ngemali engaka. Khathesi sithi sifuna igovernment ilungise khonalokhu ngendaba yokuthi asikwanisi ukuthi sihambe emsebenzini kuhle emali encane so sithi sizaqhubekela phambili legovernment ukuthi silungise ukuthi sikwanise ukuthi siqhubekele phambili sihamba emsebenzini kodwa khathesi abantu bayakhala ukuthi abakwanisi.”

Unkosikazi Nobuhle Sibindi ongumongi uthi bathwele nzima ngenxa yeholo eliphansi elingeneli lutho.

“Emsebenzini sesibuyelile kodwa kulobunzima obukhulu ngoba nxa sikhangela izinto zonke ziyakhwela ikakhulu itransport ukuthi siye emsebenzini abanye sigada ka2 ukudla asikhulumi. Kwesinye isikhathi siyehluleka ukuthi sibuye ngoba imali ingekho njalo lomsebenzi uyabe usunzima nxa sibalutshwane nxa kungakhulunyiswana kuhle kulungisiswe kutransport kakhulu lemali esiyithenjiswayo ingezelelwe kungaba ngcono kakhulu.”

Unkosikazi Sanele Mpofu oyisakhamuzi seNkulumane uthi selokhe abongi bebuyele emsebenzini, usizo abaluthola ezibhedlela selungcono.

“Sekungcono khathesi usizo esiluthola ezibhedlela akusafani lakuqala ukusasihamba esifike kungala bodokotela lamanurse kodwa khathesi kungcono sibili. Besesisesaba ukuthi lathi sesingathwala nzima sesigula singasakwazi ukuthi siyaluthola ngaphi usizo, sokungathi uhulumende angabangezelela ngalokhu abakhala ngakho ngoba labantu baqakathekile.”

Uhulumende uthembise abongi ukuthi uzalungisa ukuthi indleko zokusebenzisa imali yeCOVID allowance zingabanjwa emalini yabo kodwa zibhadalwe nguhulumende njalo izaqhubeka ibhadalwa kuzekuyefika inyanga kaMpalakazi. Uthembise njalo ukubengezelela iholo ngesilinganiso sokungamatshumi amane ekhulwini- 40%, ehlukanise indawo zokusebenzela ezibhedlela kuhambelane lemikhuhlane ekhona besekubhadalwa abongi ngendlela efanayo.

Abongi abazasebenzela endaweni ezingela ngozi bezabhadalwa amadola eZimbabwe aphakathi kwamakhulu ayisithupha kusiya kunkulungwane lengxenye-ZWL$ 600 - ZWL$1500. Kuthi abasebenzela endaweni ephakathi laphakathi amadola eZimbabwe aphakathi kwamakhulu athoba munwemunye kusiya kunkulungwane ezedlula ezimbili-ZWL$900 - ZWL$2,250.

Abasenzela endaweni elemkhuhlane eyingozi bazahlawulwa amadola aphakthi kwenkulungwane lengxenye kusiya kunkulungwane phose ezinye-ZW$1,500 - ZW$3,750.

Esigabeni esilomkhuhlane weCOVID 19, kuRed Zone bazabhadalwa inkulungwane eziyisithupha zamadola eZimbabwe- ZW$6,000. Uhulumende uthe njalo impahla yokuzivikela eye PPE ingumlandu wezibhedlela ukuthi zithengele izisebenzi.

Okwamanje iholo labongi labongi liphakathi kwenkulungwane eziyisithupha kusiyakweziyisikhombisa ZWL$6,000 kusiya kuZWL$7,000.

Imizamo yokuxhumana labogatsha lwezempilakahle abahlanganisa unobhala jikelele u Air Commodore Jasper Chimedza kanye lesikhulumi sogatsha lolu umnumzana Donald Mujiri bebengadobhi incingo. Kuthi umphathi we wogatsha lwe Health Services Board umnumzana Paulinous Sikhosana wenqabe ukuphendula imbuzo ethi ukukhefu lokuphumula.

Ekuqaleni kweviki umsekeli kaMongameli njalo engumphathintambo wezempilakahle umnumzana Constantino Chiwenga, ubikele idale lephalamende ukuba sebehlela kakutsha ukusebenza kogatsha lwezempilakahle ngendlela ezakhangela izikhalazo zabongi. Lokhu ukwethule ngoMvulo lapho ekhuluma ngamacebo abalawo owokuguqula ugatsha lolu. Ugcizelele ngokuthi uhulumende sezavimba wonke umuntu ukuba ayekwelatshwa phandle kwelizwe njengendlela yokulolondoza imali.

Facebook Forum

XS
SM
MD
LG