amalinks wokungena

Breaking News

Aqale Kubi Amaqembu akoBulawayo Kuhlandla Lesibili Lemidlalo yePSL


Castle Lager Premier Soccer League.

Iqembu le Chicken Inn yilo lodwa elenelise ukuthola umklomelo owodwa kuphela phakathi kwamaqembu ako Bulawayo adlala kusigaba se Premier Soccer League kusithi amanye wonke asele ephethe iziboya ekuphendukeni kwemidlalo ngemva kokuba kuke kwaba lekhefu lamaviki amabili.

Abafana be Chicken Inn labo basile ngesikhala senalithi njengoba belinganise umdlalo ususiya fika komlindi uyacina emdlalweni wabo leqembu le Dynamos wona ophele zingutshiki lobhanqa 1 ka 1 ngeSonto esigodlweni iHarare.

Ngosuku olufanayo iqembu le Highlanders litshaywe nge 1 ka nya ngele Black Rhinos esigodlweni iHarare njalo limpumela itsho ukuba iqembu le Bosso selitshaywe imidlalo ilandelana yabamithathu njalo linqotshwa ngempumela efanayo ngemva kokuba linqotshwe nge 1 ka nya ngele Bulawayo Chiefs kanye lele FC Platinum kungakayiwa kukhefu.

Ele Chiefs lalo litshaywe nge 1 ka nya ngele Yadah lidlala lingekhaya eLuveve kwathi ele Bulawayo City lalo lidliwe ngempumela efanayo lapho litshaywa ngele Chapungu emdlalweni odlalelwe enkabazwe.

Ekhuluma lentatheli ekupheleni komdlalo umqeqetshi weqembu le Chiefs uGarthly Chipuka uveze ukuba isimo sibucayi kuqembu lakhe elilakho ukulahlekelwa ngabadlali abambalwa besiya kwamanye amaqembu.

"Kuliqiniso ukuba abadlali bethu abanengi sebelandwe ngamaqembu amanengi abafunayo. Asisoze sivalelele abafana loba kuzakuba nzima ukuqhubekela phambili sidlala kuhle ngoba isamba sethu singasivumeli ukuba sithenge abanye abadlali kodwa sizadinga abanye abasacathulayo abazasiphathisa ukuze siphutshise umnyaka.”

Kusenjalo amaqembu ahlezi phezu kwengalane akhubekile emkhankasweni awo awokuphakamisa isicoco salonyaka kusigaba se Castle Premier Soccer League njengoba elihlezi esiqongweni sengalane ele FC Platinum litshaywe nge 2 ka 1 ngele ZPC Kariba kuthi ele Ngezi Platinum linqotshwe nge 1 ka nya ngele Herentals.

Iqembu le Ngezi Platinum selitshaywe emidlalweni emine ilandelana njalo lingaqhubeka lingadlali kuhle lingacina lihwithwa ngele Triangle eselihlezi endaweni yesithathu engalaneni yemiklomelo lilemiklomelo engamatshumi amathathu lambili ngemva kokubhaxabula ele Shabanie Mine nge 5 ka nya ngeSonto.

Iqembu le Ngezi lona lilemiklomelo engamatshumi amathathu lathoba minwe mbili kuthi ele FC Platinum lona lilemiklomelo angamatshumi amane lane.

Emsileni wengalane iqembu le Bulawayo City litshelele layahlala endaweni yesithathu nxa usuka phansi lilemiklomelo elitshumi lane ngemva kokunqotshwa kwalo ngele Chapungu okuyilo elihlezi endaweni yesine nxa usuka phansi njalo elilemiklomelo elitshumi lesithupha.

Endaweni yesibili nxa usuka phansi kuleqembu le Shabanie Mine lona elilemiklomelo elitshumi lane kuthi elijeke amanye engalaneni ngele Mutare City lona elilemiklomelo elitshumi lanye.

please wait

No media source currently available

0:00 0:02:51 0:00

Facebook Forum

XS
SM
MD
LG