amalinks wokungena

Breaking News

African Union: Njengoba uMugabe Sowasuka Esihlalweni, Linga meyisi


Imota ethwala impahli.

I African Union kufanele isukume ikhuthaze uhulumende weZimbabwe ukuthi ethule ukhetho olukhululekileyo.

Lokhu kwethulwe yizizalwane zeZimbabwe kweleSouth Africa ngesikhathi zimanyene lezinye zezwekazi leAfrica emkhosini wokunanza ilanga elabunjwa ngalo umanyano wamazwe awezwekazi labensundu ele Africa Day owenzelwe eJohannesburg ngempelaviki.

Amakhulu ezizalwane zezwekazi le Africa abegcwele ezitaladeni zeBerea, Yeoville leHilbrow ngempelaviki emkhosini wokufola bethakazelela ilanga le Africa Day.

Kulo umkhosi abamazwe atshiyeneyo bebegqoke impahla ezikhombisa umbala wefulegi yabo kanti njalo behlabela lokugida imigido yabo yesintu.

Inengi lezizalwane zeZimbabwe zona zitshengise ukungalithokozeli leli langa. Bakhona abathi amazwe e Africa ehlulekile ukuphathisa izizalwane zeZimbabwe ekutholeni inkululeko egcweleyo eminyakeni engamatshumi amathathu lasitshiyagalombili edluleyo.

Isizalwane seZimbabwe umnumnzana Tony Drink Water uthi kunengi lezizalwane zeZimbabwe ukuba ngumAfrica sekuphenduke kwaba yibuyanga, ukuhlukumezwa nguhulumende wabansundu, ukubaleka elizweni lakho usiyakuba ngumhambuma lokuthathelwa amalungelo akho njengomuntu.

Kutsho uDrink Water: “Lamhlanjena i Africa Day isafananje njengamanye amalanga kimi njenge Zimbabwean njengoba selokhu kwaphuma yena uRobert Mugabe laloMnangagwa angikaboni utshintsho kimi njengomuntu omutsha ngoba kusafana njengalesiya sikhathi kusaselo RG.”

Esinye njalo isizalwane seZimbabwe umnumnzana Lovemore Dube uthi ayikho into etheni azigqaja ngayo ngezwekazi le Africa ikakhulu ngenxa yokuthi sekuleminyaka i African Union ingazihluphi ngokungaqhutshwa kuhle kwezombusazwe eZimbabwe.

Laye uvumelana labanengi ukuthi lonyaka i African Union ilethuba lokutshengisa izizalwane zeZimbabwe ukuthi iyinhlanganiso eloncedo.

“Thina ama Zimbabweans sikhangelele ukuthi i Africa yonkele izasukuma ithi akube lokhetho olungelabuqili kungene inkokheli ezikhethwe ngabantu, not irigging le ebesiyibona kuminyaka edlulileyo,” kutsho uDube.

UPromise Sibanda odume ngelishi DJ Mapressa yena uthi okufanele kuqakathekiswe yizizalwane zezwekazi le Africa ngaleli langa yikuthi phansi ngokucwasana ngobuzwe, lemibala lendimi kube kanti phambili ngokulwiswa kukuncindezelana.

“Nga ingadala lokubambana kwezwekazi le Africa. Ngoba sinje thina singamaZimbabwean kodwa ngokuphila siphila eSouth Africa. Sengitsho kanye lawo ama South African babephila eZimbabwe ngesikhathi somzabalazo ngesikhathi seApartheid lapho,” kutsho uSibanda.

Abanengi bathi kufanele i African Union njengomama weZimbabwe iqakathekise lokhu okulungele izizalwane zeZimbabwe hatshi inkokheli kuphela.

Facebook Forum

XS
SM
MD
LG