amalinks wokungena

Breaking News

Akhalela Usizo Lwemali Amaqembu Omdlalo Wenguqu eZimbabwe


Isiphathamandla seqembu leHighlanders, uNhlanla Dube

Amaqembu omdlalo enguqu, aweZimbabwe, ayesabela ukuba kungawasinda ukubuyela ukuyadlalela ezinkundleni nxa engatholanga usekelo lwemali.

Okwethulwe yikhomithi yababona ngezempilakahle phezu kokuba kuyini okumele kwenziwe ukuze ilizwe le Zimbabwe liqalise njalo ukudlala umdlalo wenguqu kutshiye inengi lamaqembu adlala kusigaba se Premier Soccer League evumelana ukuba adinga usekelo lwemali.

Ikhomithi le ekhokhelwa nguDokotela, uEdward Chagonda ithe kuyabe kumele abadlali behlolwe mihla ngemihla kusentshenziswa impahla ethile ebiza amadola akweleMelika angamatshumi ayisithupha lanhlanu.

Lokhu kuyabe kusitsho ukuba amaqembu kuzabe kumele akhokhe imali edlula phose inkulungwane ezilitshumi zamadola aseMelika ukuze kuhlolwe abadlali abangamatshumi amathathu kanye labaqeqetshi abalitshumi.

Bebuzwa zintatheli zemidlalo abameli bamaqembu amakhulu elizweni athi ele Dynamos kanye lele Highlanders bathe abangeke benelise ukubhadala imali engako njalo intathelizindaba yezemidlalo uBongani Zoza uthi akungajahwa ukuphindela enkundleni imidlalo iqale ngomnyaka ozayo.

“Inengi lamaqembu livele liyehluleka ukubhadala abadlali pho imali zokubhadalela abadlali ukuba behlolwe zingavela ngaphi?

Okunye okumele sikukhumbule yikuba ibhola kalidlalwa ku PSL kuphela njalo kuzigaba eziphansi yikho lapho okulamaqembu aqhuba nzima khona okokuthi vele lemali eyaphiwa abe Zifa yinhlanganiso ye FIFA ayingeke yenele.

Ngokubona kwami kungcono ukuba kulindwe kuze kuqalwe ngomnyaka ozayo,” kutsho uZoza.

Isiphathamandla seqembu le Highlanders, uNhlanhla Dube utshele iphephandaba le Herald ukuba amaqembu wodwa awangeke eyenelise ukubhadalela ukuhlolwa okudingakalayo phambilini kokuba kubuyelwe enkundleni.

Uqhubekele phambili wathi lokho kungenzeka kuphela nxa inhlanganiso ezibalisa eye Zimbabwe Football Association, eye Premier Soccer League kanye leye Sport and Recreation Commission, zingangenela.

Isiphathamandla seqembu le Chicken Inn uTawengwa Hara laye uthe amaqembu adinga ukuphathiswa yi ZIFA ikanti labanikazi benkundla labo kuzabe kumele bedlale eyabo indima kube yibo abahlanza inkundla ngokufafaza imithi ebulala amagciwane.

Facebook Forum

XS
SM
MD
LG