Zonke indlela ziqonda edolobheni lako Bulawayo lapho okulemidlalo emibili ezadlalwa ngamaqembu amela ilizwe emdlalweni wenguqu kanye lasemdlalweni we rugby ikanti imidlalo yalonyaka eye Spar Bonsa T20 Cricket League layo ingena kuviki yesibili.
Iqembu labesilisa elimela ilizwe emdlalweni weRugby eyohlobo oludlalwa ngabadlali abalitshumi lanhlanu elaziwa ngegama elithi Sables lizemukela iqembu labosowabo abamela ilizwe le Kenya ngoMgqibelo enkundleni yeHartsfield esedolobheni lako Bulawayo.
Lawa maqembu adibana emdlalweni wenkezo ye Victoria Cup okuyimidlalo edlalwa ngamazwe abalisa ele Kenya, ele Uganda, ele Zambia kanye lele Zimbabwe.
Womabili amaqembu lawa azadibana kusasa awakanqotshwa kumidlalo emibili aseyidlale phambilini kwalo owangoMgqibelo kodwa eminyakeni eyedluleyo iqembu le Kenya belizithaphuzela kwele Zimbabwe okuyinto eyayingajwayelekanga kudala.
Ekhuluma lentathelizindaba umqeqetshi weqembu le Zimbabwe uBrendan Dawson uthe yena ilizwe leZimbabwe lilabadlali abanengi abaphandle kwelizwe abangaliphathisa ukuba liqine futhi njengakudala.
“Sikhuthaza abadlali abadlala phandle kwelizwe ukuba baphenduke bezodlalela iqembu lesizwe ngoba sikhuluma nje kulabadlali abazinkulungwane abaphandle kwelizwe njalo sifuna ukuba bazwe betshiseka befuna ukuphenduka bezodlalela iqembu lesizwe,” kutsho u Dawson.
Emidlalweni yalo emibili eyakuqala iqembu leZimbabwe litshaye ele Zambia nge 39 ka 10 kowakuqala kwathi kowesibili linqobe ele Uganda nge 31 ka 26.
Umncintiswano we Victoria Cup uvuselelwe lonyaka ngemva kokungadlalwa eminyakeni eyisikhombisa eyedluleyo njalo uvuselelwe ngemva kokuba inhlanganiso ebona ngokuqhutshwa komdlalo we rugby kuzwekazi lase Africa eye Rugby Africa ilahlekelwe lusekelo lwemali ukuba iqhube umncintiswano we Africa Gold Cup.
NgeSonto iqembu elimela ilizwe emdlaweni wenguqu lizangqikilana lele Mauritius enkundleni ye Barbourfields emdlalweni wehlandla lesibili kusigaba sesibili esomncintiswano we Africa Nations Championships.
Iqembu le Zimbabwe lizangena kumdlalo lo livele likhokhela nge 4 ka nya ngemva kokunqoba elikwenze ngoMvulo emdlalweni wehlandla lakuqala oqhutshelwe kwele Mauritius.
Lumkhankaso ngowokudinga amaqembu azakuyadlala kumncintiswano we Chan ozaqhutshelwa elizweni lase Cameroon ngomnyaka ozayo.
Kusenjalo iqembu labesifazane elimela ilizwe le Zimbabwe emdlalweni wenguqu elaziwa ngegama elithi Mighty Warriors libhaxabule ele Mozambique nge 4 ka nya emdlalweni walo owesibili kumncintiswano walonyaka owenkezo ye Cosafa oqhutshelwa elizweni lase South Africa kulezinsuku.
Abahlohlele iqembu le Zimbabwe ngababalisa uRudo Neshamba, uEmmaculate Msipa kanye lo Marjoury Nyaumwe yena olitshayele emambuleni kabili. Emdlalweni walo wakuqala iqembu le Zimbabwe litshaye ele Angola nge 4 ka 1.
Imidlalo yalonyaka eye Spar Bonsa T20 Cricket League ingena kuviki yesibili kulimpelaviki njalo amaqembu azadlala ngokulandelayo.
NgoMgqibelo iqembu le Fazak Power Raptors lizadlala le Pespi Hawks, iqembu le Fastjet Badgers lizadibana lele Canela Sabres kuthi iqembu le Mermaid Pool Blazers lizadlala lele National Fencing Tigers.
NgeSonto iqembu le National Fencing Tigers lizangqikilana lele Canela Sabres, iqembu le Fazak Power Raptors lizadlala lele Mermaid Pool Blazers kuthi umdlalo owokucina uzakuba phakathi kweqembu le FastJet Badgers kanye lele Pepsi Hawks.
