Uzulu lamanye amabandla ezombusazwe bathukuthele ngokwenziwe ngamanye amalunga edale lephalamende awehluleke ukuveza ukuthi asebenzisa njani imali yokuthuthukisa izabelo eye Constituency Development Fund.
Ngakho-ke bathi amalunga la akubandla le Zanu-PF le Movement for Democratic Change ekhokhelwa nguMnu Morgan Tsvangirai kumele abotshwe ngoba enakanelwa ukuthi adla imali kahulumende.
Ibandla le Zapu le Mavambo Kusile athi kumele labo abehluleka ukuveza ukuthi benzani ngenkulungwane ezingamatshumi amahlanu zamadollar baxotshwe ngamabandla abo.
Izizalwane ze Zimbabwe zithi lokhu okwenziwe ngamalunga edale lephalamende la kuyayangisa njalo kumele ajeziswe.
Amanye amalunga edale lephalamende la, agoqela abaphathintambo bengatsha zikahulumende, athi asadinga ingcwadi ezitshengisa ukuthi asebenzisa njani imali le.
Isikhwama semali yeCDF, sasungulwa ngenjongo yokuthi leyo mali isetshenziswe enhlelweni zentuthuko ezifana lokwakha amadamu, izikolo, ukwemba imigodi yamanzi lezinye ezehlukeneyo.
Umnu. Nkosilathi Nkomo wemzini weNjube edolobheni lako Bulawayo uthi amapholisa kawasoze enze lutho ngalabo abacatshangwelwa ukuthi badla imali yezabelo.
Unkosazana Thabitha Khumalo umsekeli wesikhulumeli sebandla le MDC elikhokhelwa nguMnu. Morgan Tsvangirai uthi ibandla lakhe kalikadingisisi ngokusetshenziswa kwemali yokuthuthukisa izabelo okuthiwa yadliwa ngamanye amalunga edale lephalamende.
Akubotshwe Amalunga Edale Lephalamende Angavezanga Ukusetshenziswa Kwemali Yezabelo
- Gibbs Dube
