amalinks wokungena

Breaking News

Umpathintambo Wezemali Ubanjwa Ngamandla Ukudinga Imali Yokukhuphula Iholo Lezisebenzi Zikahulumende


Umpathintambo wezemali ulaywe ukuthi kumele aguduze ezambeni zonke ezigcina imali yesizwe aze ayithole eyokukhuphula iholo lezisebenzi

Inkokheli kahulumende womanyano isithethe isinqumo sokuthi kumele umphathintambo wezemali uMnu. Tendai Biti adinge imali yokubhadala izisebenzi zikahulumende kulandela isithembiso esenziwe nguMongameli Robert Mugabe ngoMabasa sokwengezelela izisebenzi lezi iholo ngoNhlangula.

UMugabe, inhloko kahulumende uMnu. Morgan Tsvangirai lomsekeli wakhe uMnu. Arthur Mutambara babikwa bevumelene ngoLwesihlanu ukuthi uBiti kumele aguduze ezambeni zonke ezigcina imali yesizwe aze ayithole eyokukhuphula iholo lezisebenzi zikahulumende.

Inkokheli le kayitshongo ukuthi uBiti kumele ayithole njani limali loba nje uhlangothi lokubuthaniswa kwemali kahulumende olwe Zimbabwe Revenue Authority lubikwa luthole imali eyedlula eyayikhangelelwe enyangeni ezisanda kwedlula evele emithelweni etshiyeneyo.

UBiti uthi ilizwe kalilamali njalo akubonakali ukuthi imali etholwa emsebenzini wokwenjiwa lokuthengiswa kwamadayimana eMarange iyangaphi lokuthi yenziwani.

Kusenjalo, inhlanganiso emele ababalisi eye Progressive Teachers Union of Zimbabwe ithi nxa uhulumende engakhuphulanga iholo ngoMabasa kuzaba lokugedla kwamazinyo.

Umsekeli kamqondisi we PTUZ uNkosikazi Nokuthula Hlabangane uthi kumele uBiti adinge imali efunakalayo ngamehlo abomvu.

Ingcwethi kwezenotho uMnu. Masimba Kuchera uthi uhulumende kalamali yokhuphula iholo lezisebenzi ngakhoke akaboni ukuthi uBiti kuzamele ayeyidobha ngaphi sibili.

XS
SM
MD
LG