Akusela qembu elinqobe kuyo yonke imidlalo esidlalwe lonyaka kusigaba se Castle Premier Soccer League ngemva kokuba iqembu leNgezi Platinum libe ngutshiki lobhanqa 1 ka 1 leqembu le Shabanie Mine emdlalweni odlalelwe enkundleni ye Mandava izolo.
Limpumela itsho ukuba iqembu le Ngezi selilemiklomelo elitshumi lesithupha okulinani eliphethwe liqembu eselihlezi phezu kwengalane okuyilo njalo eliphethe isicoco seligi ele FC Platinum loba elinqobe ele Harare City nge 3 ka 1 ngoMgqibelo.
Ko Bulawayo emagumeni eBarbourfields bekulomdlalo obugoqela amaqembu amabili aphuma edolobheni lako Bulawayo ele Highlanders lele Chicken Inn wona ophele zingutshiki lobhanqa 2 ka 2.
Iqembu le Highlanders lihlohlelwe ngu Brian Banda kanye lo Gabriel Nyoni kuthi ele Chicken Inn lihlohlelwe ngu Innocent Mucheneka kanye lo Simon Munawa.
Intathelizindaba yezemidlalo uNash Mkokwayarira uthi indlela okudlalwe ngayo yilawamaqembu iveza ukuba umdlalo wenguqu uyathuthuka kwele Zimbabwe.
“Umdlalo wanamhle ubungumdlalo omuhle kakhulu utshengisele ukuba ibhola lethu liqhubekela phambili.
Singakhangela indlela amagoli amathathu angene kulumdlalo ahlohlwe kakuhle okuyinto etshengisa ukuba umdlalo wethu uqhubekela phambili,” kutsho uMkokwayarira.
Kweminye imidlalo ebikhona namhla iqembu le Triangle litshaye ele CAPS United nge 2 ka 1 kuthi ele Dynamos libe ngutshiki lobhanqa 1 ka 1 lele Yadah emdlalweni oke wamiswa ngemva kokuba sekube lobudlwangudlwangu enkundleni abalandeli sebephosela izikhali enkundleni.
