Ugatsha olubona ngezobudlelwano lamanye amazwe lwethule inkuthazo kumphathintambo wezemali uMnu. Tendai Biti yokuthi ele Zimbabwe kumele lithenge izakhiwo zezigodlo zabameli belizwe kwamanye amazwe womhlaba.
Unobhala walolugatsha uMnu. Joey Bimha ubikwa ethulele uBiti lolu gwalo waqonqosela ukuthi kumele azame ngamandla ukuthenga limpahla emazweni.
UBimha uthi indleko zinkulu nxa ilizwe lihlawula imithelo kubanikazi bezakhiwo lezi kulokuzithengela okuqondane lalo.
UBiti okwamanje utshukana le budget ka 2011 azayethula ngoLwesine ngeviki ezayo.
Uhulumende usebenzisa izigidi ezintathu zamadola eMelika ngenyanga yokubhadala imithelo emazweni atshiyeneyo njalo ilizwe lilezikwelede zokungabhadali limithelo ezedlula izigidi ezingamatshumi amathathu zamadola eMelika.
Kodwa-ke umsekeli wompathintambo walolu gatsha, uMnu. Moses Mzila-Ndlovu utshele uGibbs Dube we Studio 7 ukuthi ele Zimbabwe lingeke lenelisa ukuthenga impahla emazweni njengoba livele lisenkingeni yokuswela imali.