amalinks wokungena

Breaking News

Akwaziwa Ukuba iFIFA Izojezisa iZimbabwe Kumbe Hatshi


Bahlalele evalweni abakumdlalo wenguqu njengoba kulokhu kungakaxazululwa ukufuthelana okuphakathi kwekomishini kahulumende elawula ezemidlalo eye Sports and Recreation Commission lenhlanganiso eqondisa umdlalo wenguqu eye Zimbabwe Football Association.

Sekuzinsuku ezimbili kwedlule usuku olwabekwa yinhlanganiso eqondisa ezomdlalo wenguqu emhlabeni jikelele eye Federation of International Football Association, iFifa, njengelanga lokucina elokuba ikhomishini eye Sports and Recreation Commission ibuyisele emsebenzini ibhodi ye Zimbabwe Football Association ukuze ele Zimbabwe lingajeziswa.

I-SRC okuyiyo elawula ukuqhutshwa kwemidlalo yonke nje elizweni, imise umsebenzi ibhodi ye Zifa ngenyanga ka Lwezi njalo ngoMpalakazi kube lencwadi okuthiwe ngabe Zifa ivele kwabe Fifa ebisithi kungedlula mhla zintathu kunyanga kaZibandlela ilizwe lizamiswa ukuphatheka kumncintiswano lamanye amazwe.

Owake waba ngumgcinisihlalo wenhlanganiso ye Zifa uVincent Pamire uthi ibhodi eyamiswa umsebenzi ngabe ihle iziphumele esikhundleni kulokuthi ilwise ukukhutshwa kwayo.

“U (Sepp) Blatter akakhitshwanga ku congress kodwa wakhitshwa ngamandla ezombusazwe. Amandla ombusazwe akhona ebholeni njalo ungabona sekufike kulelozinga kungcono wena uhle wehlise umoya ubayekele benze ngento zabo ngoba okusalayo akusikho kwakho nxa kuyikuthi uvele usebenzela abantu.

Laba bona vele kabala nkinga ngoba vele ubukhokheli babo bebusalelwe zinyanga ezintathu okokuthi akulasikhathi sokulwa ngoba bengalwa kuze kufike umnyaka ozayo. Kungcono bakwamukele ukuba sekonakele.

Ngokubona kwami iFifa kayisoze ijezise iZimbabwe ithi kayingadlali ku Afcon ngoba layo iCaf kayifuni ukuba kuphazamiswe imidlalo yayo,” kutsho uPamire.

Kulomzamo osuqalwe ngamakhansila amela inhlangothi ezitshiyeneyo ezomdlalo wenguqu ezibalisa eye Premier Soccer League, iNorthern Region kanye le Eastern Region owokubiza umhlangano lapho okuzaxazululwa khona indaba eziphazamisa ukuqhutshwa kuhle umdlalo wenguqu elizweni.

Umhlangano lo ubikwa uzaqhutshelwa esigodlweni iHarare mhla zimatshumi mabili lathoba munwe munye yonale inyanga kaZibandlela.

Owake waba kunkokheli ye Zifa Southern Region uTumeliso Drogba Makhurane uthi amakhansila lawa kwakumele ngabe kudala aqala imizamo eyokulungisisa umdlalo wenguqu elizweni.

“I petition leyi efakwe ngamakhansila hayi yona bayifake belandela isisekelo sombuso, kabaphazamisanga sibili.

Inkinga yisikhathi abayifake ngayo ngoba baze baqalelwa ngase Sport Commission ukuthi baphakamise amakhanda bethi kukhona okungahambi kuhle.

Okunye njalo abanye babo ababhale leyo petition kukhanya bakuluhlu lwalabo abamiswe umsebenzi yi sports commission. Okokuthi njengoba le bhodi layo njengoba yamiswa umsebenzi kuyabe sekunxele ukuba bangene umhlangano labantu abamiswa umsebenzi ngoba umhlangani lowo uyabe usuyize,” kutsho uMakhurane.

Kusaziso sabo esokuqhuba umhlangano amakhansila athe indaba ezizahlafunwa ngalolosuku ngezigoqela ukumiswa umsebenzi kwe bhodi ye Zifa kanye lokungenzakala nxa ilizwe le Zimbabwe lingamiswa ukudlala lamanye amazwe.

Olilunga lenhlanganiso ye Zimbabwe Soccer Coaches Association ko Bulawayo uMorris Mukwiti uthi kungaba kubi kakhulu nxa ele Zimbabwe lingajeziswa yinhlanganiso ye Fifa.

“Thina sikhangelele ukuthi ibhola lidlalwe. Lokhu okwenzakala phakathi kwe Zifa le SRC thina akusiphathi. Kumele balungise umuzi wabo uqoqeke kungakabi lemncintiswano afana labo Afcon.

Ngoba thina nxa ilizwe lingajeziswa kuthiwe ibhola kalisadlalwa impilo zabantwana labaqeqetshi zizakuba senkungeni njengoba siphiliswa ngezemidlalo.

Thina sikhulekela ukuba i SRC le Zifa babe lokuzwanana belungise inking zabo njengabakhokheli bezemidlalo,” kutsho uMukwiti.

Kulemibiko ethi ilizwe lase Zambia selihle lahlala lilungele ukuyathatha indawo ye Zimbabwe kumncintiswano we Africa Cup of Nations wona okumele uqale ensukwini ezilandelayo kwele Cameron nxa kungenzeka ukuba lijeziswe yi Fifa.

Izijeziso ze Fifa zigoqela ukungaphatheki kwelizwe le Zimbabwe kumncintiswano eqoqwa ngaphansi kokulawula kwenhlanganiso ye Fifa ikanti labadlali bakwele Zimbabwe bayabe bengasayenelisi ukuyadlala kwamanye amazwe.

Lokhu kuke kwenzakala emdlalweni kakhilikithi ngemva kokuba abe SRC bemise umsebenzi inkokheli yenhlanganiso ye Zimbabwe Cricket okuyisenzo esithiwe ngabenhlanganiso ye International Cricket Council yikungenela kukahulumende ekuqhutshweni komdlalo kakhilithi.

Facebook Forum

XS
SM
MD
LG