amalinks wokungena

Akwehliswe Indleko Yenhambo Zeziphathamandla Zikahulumende: Cabinet

  • Gibbs Dube

Idale labamapthintambo eleCabinet eZimbabwe selithethe izinqumo zokuthi kwehliswe indleko yenhambo zeziphathamandla zikahulumende lokuthi yonke imali etholwa zingatsha zikahulumende iphathwe lugatsha lwezemali.

Umhlangano wedale leli ubikwa wenziwe ngesiphangiphangi eHarare ngoLwesine kuhlolisiswa umumo womnotho elizweni.

Kubikwa kuphindwe kwathathwa isinqumo sokuthi iZimbabwe Revenue Authority sokumele ilonde imali yamadayimana ngokuvula amawofisi eMarange.

Amalunga edale abikwa ethe kuzamele ingatsha zikahulumende ezikhokhelwa yi Zanu PF ziguqule indlela ezisebenzisa ngayo imali etholakala kuzulu. Ingatsha lezi zigoqela olubona ngezokuthwalwa kwempahla labantu kanye lolwezemithetho.

Uhulumende ubhekane lohlupho lokuswelakala kwemali okubi osekubangela ukuthi ehluleke ukuthola eyokuholisa amasotsha asanda kuqeda ukufundela umsebenzi.

Idale leli lithe kalichelesi ngokuqhatshwa kwamasotsha la angeke axotshwe okwamanje njengoba asekhangelane lezomvikela.

Ugatsha lwezemali lubikwa lukhala ngokuthi lokhe kuqatshwa izisebenzi engatsheni ezimbalwa zikahulumende lona lungabikelwanga.

Umnu. Bbekithemba Mhlanga ingcwethi kwezenotho uthi kumele amalunga edale leCabinet aphathisane ekulungiseni umnotho welizwe.

Ukuhlaziya umumo womnotho we Zimbabwe lezinqumo ezithethwe lidale leCabinet ngolweSine uGibbs Dube uxoxe lengcwethi kwezenotho uMnu. Daniel Ndlela loMnu. Rejoice Ngwenya abathe kumele uhulumende womanyano azame ukulungisa ezombusazwe ukwenzela ukuthi umnotho welizwe uguquke ngendlela eqondileyo.

XS
SM
MD
LG