Inhloko kahulumende weZimbabwe uMnumzana Morgan Tsvangirai usesiwe esibhedlela eSouth Africa ukuyakhangelwa amakhala alimalayo aze atshaywe ngabakhangele umthetho kungakenziwa ukhetho nyakomunye.
UTsvangirai usuke ngoLwesithathu eZimbabwe waya esibhedlela eGoli lapho ahlolisiswa khona amakhala.
Isikhulumeli sakhe uMnu. James Maridadi walile ukutshela iStudio 7 ukuthi ukulimala kwakhe lokhu kuyahambelana lokutshaywa kwakhe ngamapholisa lalabo abaku CIO.
U Maridadi uthi kuyaziwa ukuthi uTsvangirai watshaywa okwamagama ngabakhangel’umthetho abadlelana lebandla le Zanu PF.
Uthe uTsvangirai ubikele asebenza labo esuka eZimbabwe ukuthi kathakazeleli ukuthi avuselele izilonda ezibhibhidlayo ngokukhuluma ngaloludaba.
Abakwaziyo ngaloludaba bathi uTsvangirai uzalungiswa amakhala lapho alimala khona ngoLwesithathu ntambama kumbe ngoLwesine ekuseni.
Ukhangelelwe ukuthi ukuphindela eZimbabwe ngempelaviki kumbe ngeviki ezayo.