Amapholisa abikwa aseqalisile ukudingisisa ngodaba lukaNkosazana Xolile Maphosa othi uthunjiwe njalo wahlukuluzwa ngabantu angabaziyo koBulawayo ngoLwesihlanu, bembuzisisa ngomalumakhe olwela ilungelo loluntu uMnu. Josphat Ngulube, obikwa engazakali ukuthi ungaphi.
UNkosazana Maphosa uthi wadatshulelwa impahla ayezigqokile ezigoqela ezangaphansi, watshwaywa, andubana wabuyiselwa ngakibo.
Igqwetha elimela uNkosazana Maphosa, uMnu. Nqobani Sithole usichasisela okunengi ngaloludaba, kanye lolukaNkosazana Nokuthula lo Ntombizodwa Mpofu, abathi bahlukuluzwa ngokufanayo kulelidolobho. UMnu. Sithole uthi udaba lwabo lwamiswa ukuthethwa ngoba idale leWest Commnonage livaliwe ngokuphathelane legcikwane leCOVID 19. Uqala ngokusichasisela ngolukaNkosazana Maphosa.
Ngesikhathi amabandla ezombusazwe aphikisayo kanye labalwela amalungelo oluntu besithi bayahlukuluzwa, iziphathamandla zikahulumende ezigoqela uMnu. Victor Matemadanda loMnu. Nick Mangwana, bakuphikile lokhu kungxoxo ezehlukeneyo lentathelizindaba begcona labo abakhononayo.
Ukuhlukuluzwa, ukuthunjwa, lokubotshwa lokhu lulandela ukuqoqwa kokutshengisela okwakukhangelelwe ukuba khona ekupheleni kwenyanga edluleyo.
Kusenjalo, ummeli weNkayi North edale lephalamende uNkosikazi Sithembiso Nyoni, ongumphathintambo obona ngeziphathelane labesifazana kanye lezamabhizimusi amancinyane, njalo eyisiphathamandla sebandla leZANU PF uthi ukhuthaza abakhonona ngesiphatho sikahulumende ukuthi besebenzise amakhomishini agoqela eyeZimbabwe Anti-Corruption Commission, National Peace and Reconciliation Commission lezinye kulokulgiimela ukuloba ebulenjini be social media.