Amagqwetha abegqoke izembatho zawo zomsebenzi afolile ngoLwesibili esuka enzikini yedolobho leHarare esiyakhweza izikhalazo zawo emthethwandaba weConstitutional Court, esola ukwephulwa kwamalungelo oluntu elizweni.
Ukufola lokhu bekuqoqwe yinhlanganiso elwela amalungelo amagwetha eyeZimbabwe Law Society, yona ethi omantshi behlulela amacala ngesiphange-phange abantu bengakadingi abammeli kukanti bencitshwa mahlayana ithuba lokuhlawula imali yesibambiso se bail.
Lokhu kulandela ukutshengisela kwabantu kumaviki amabili edluleyo besola isimo somnotho elizweni, okwabangela ukubulawa, ukutshaywa, kanye lokulimala kwabanye, lembiko ethi abesifazana badlwengulwa libutho.
Ukuhlaziya loludaba, sixoxe loMnu. Rejoice Ngwenya, ingcwethi ecubungula ezombusazwe yena othi ukutshengisela kwamagqwetha kunika isisindo kumikhankaso yokuzama ukutshengisa umhlaba okwenzakala eZimbabwe .
Kusenjalo, ibandla leMDC lithi ukwephulwa kwelungelo loluntu nguhulumende sokufike kuzinga elibi kakhulu njalo kufanele umanyano weSADC, inhlanganiso ezizimeleyo, kanye lamazwe omhlaba angenele kuloludaba.
Ekhuluma emhlanganweni lentathelizindaba ngoLwesibili eHarare, umkhokheli weMDC uMnu. Nelson Chamisa usole amanye amazwe ngokungangeneli kokwenzakala eZimbabwe esithi akufanelanga bamelele ukuthi inani lezidumbu zababulawa libutho kumbe abesifazana abadlwengulwayo liqonge.
Isikhulumeli sikaMnu. Chamisa, uMnu. Nkululeko Sibanda uchasisa okunengi okukhulunywe kulumhlangano.