Iziphathamandla labasekeli bebandla le People’s Democratic Party (PDP) elikhokhelwa nguMnu. Tendai Biti babikwa sebexexebuke kulelibandla besiya kubandla le Zimbabwe People First elikhokhelwa nguNkosikazi Joice Mujuru.
Ngempelasonto kubikwa amalunga esigaba se Matabeleland North etshiye ibandla le PDP ngobunengi.
Omunye othiwa ulakho ukusuka kulelibandla nguMnu. Sam Sipepa Nkomo umsekeli kamongameli we PDP okuthiwa uthenjiswe ukuba ngumsekeli kaNkosikazi Mujuru.
Kodwa uSipepa Nkomo uthe okwakathesi kangeke akhuluma ngaloludaba kodwa kuzakuba lomhlangano lentathelizindaba ngoLwesine lapho azazisa khona ngelakusasa lakhe kwezombusazwe.
Kodwa isikhulumeli sakhe, uMnu. Edwin Ndlovu, utshele iStudio 7 ukuthi balembiko yokuthi ibandla le Zimbabwe People First lihuga amalunga ebandla labo ngezikhundla.
"Kukhanya kulodaba olunjalo kodwa sikuzwa ngamahungahunga ukuthi kakhulu amalunga ethu eMatabeleland North baphumile emaphephendabeni kuthiwa bajoyine uMujuru kuyasidanisa kakhulu lokhu," kutsho uNkomo.
