Amalunga eboard yebhanga elikhulu lelizwe eye Reserve Bank of Zimbabwe athi amangaliswa yikuthi kazange amenywe kusese lesikhathi ngusibalukhulu we RBZ uMnu. Gideon Gono ukuthi aye emhlanganweni wokuhlolisisa ukusebenza kwalelibhanga obuqoqwe yikhomithi yedale lephalamende ekhangelane lokusetshenziswa kwemali kahulumende.
Amalunga la atshele iStudio 7 ukuthi idale lephalamede lenze kahle ngoMvulo ukuthi lixotshe uGono emhlanganweni lo obulomcebisi wakhe uMnu. Munyaradzi Kereke, uMnu. George Smith elinye lamalunga kanye lonobhala weboard uMnu. Arthur Manase.
Bathi uGono ubefuna ukufihla okwenzakala ebhanga leli yikho nje etshele abanye bakhe ngomhlangano sokungasela sikhathi sokuthi balungiselele ukuya edale lephalamende.
Baqhubeke bethi uGono wesaba ukwembulwa amakhwapha ngalokho abekwenza ebhanga le RBZ kungakabunjwa uhulumende womanyano ngomnyaka ka 2009.
Ingcwethi kwezombusazwe uMnu. Nkululeko Sibanda uthi kumele uGono abanjwe ngamandla ukuthi ethule okufunwa lidale lephalamende elamalunga wonke awe board ye RBZ.
