Amanye amalunga edale leCabinet athi kawasekeli ngitsho lakancane iziqondiso zokuqula umthetho we Liquor Act ezibunjwayo - eze National Alcohol Policy – ezibikwa sezihluzwa lidale leli.
Lokhu kukhangelelwe ukwenza ukuthi utshwala buthengiswe phakathi kweviki kusukela ngo 6 am ekuseni kusiya ngo7pm ntambama njalo buthengiswe okwesikhathi esifitshane ngeNsonto.
Amalunga la atshele iStudio 7 ukuthi iziqondiso zomthetho lo kazikahluzwa lidale njalo angeke achitha isikhathi ekhuluma ngalokhu uzulu ekhangelele ukuthi athole okungcono okuvela kuhulumende.
Omunye wamalunga la uNkosazana Paurina Mupariwa ongumphathintambo wezenhlalakahle kazulu uthi kumele idale leCabinet likhankasele ukudingela uzulu amaqhinga okuziphilisa lokunye okunganceda abantu makhaza kulokuchitha isikhathi kukhulunywa ngemithetho engayakhi isizwe.
Iziqondiso zomthetho lo zilotshwe nguMnu. Timothy Stamps ongumcebisi wezempilakahla kaMongameli Robert Mugabe.
Ingcwethi kwezokuthuthukisa inotho kazulu uMnu. Liberty Bhebhe uthi kungamangalisa nxa idale le cabinet lixoxa ngomthetho wokunatha utshwala uzulu esidla inqweqwe zomlomo.
Amalunga Edale le Cabinet Athi Kawasekeli Umthetho Wokwehlisa Isikhathi Sokunatha Utshwala
- Gibbs Dube
