amalinks wokungena

Amalunga Edale Lephalamende Ahlolisisa Ukwendiswa Kwabantwana


Amalunga edale lephalamende akade eqhuba uhlelo emaphandleni afuna ukuthi kuvalwe ukwendisa abantwanyana.

Inhlanganiso yamazwe ezansi yezwekazi le Africa, iSouthern African Development Community (SADC) Parliamentary Forum, iSADC Parliamentary Forum Plenary Assembly lePhalamende yeZimbabwe besebenza lamalunga ekhomidi yedale lephalamende, sebebhodabhoda eZimbabwe bedinga imbono kaZulu ngafuna kumumathwe ngumthetho ozakwenqabela ukwenda kwabantwana abangabafana lamantombazana abaleminyaka engaphansi kwelitshumi lasificaminwe mbili.

Lokhu kuvunyelwa eZimbabwe lakwamanye amazwe.

EZimbabwe isisekelo sombuso welizwe kusahluko 81 sithi wonke umuntu oleminyaka engaphansi kwetshumi lasifica minwe mibili ngumntwana, kuthi usahluko 26 uthi kumele uhulumende abone ukuba akulamntwana onikelwa ukuba ayende.

Ukwenda kwabantwanyana eZimbabwe kuvame eMashonaland Central lobanje ezinye izigaba zelizwe lazo zisendisa abantwana.

UMthwakazi uthe wonke umuntu ophatheka kudaba lokwendisa abasakhulayo kabotshwe aye eintolowengweni okwedlula imnyaka emihlanu kuthi inkokheli zomdabu ezekelela abantu bazo bephatheka kuhlelo lokwendisa abasakhulayo labo babotshwe ngoba kutshengisa ukwehluleka ukukhokhela kanye lokulandela isisekelo sombuso.

USenator Ruth Labode, okukhomithi yedake lephalamende ebona ngezokuqeda ukwenda kwabantwana, uthe baphakathi kokudinga imbono kazulu ukuze balobe umthetho oqinileyo.

ULabode uthi lapho asebefike khona inengi labantu lithi iminyaka elitshumi lasificaminwe mibili kayibe ngumthetho oqinileyo ongavumeli ukwenda lokuthathwa komntwana ongaphansi kwaleyo minyaka.

USenator Jasmine Toffa usole kakhulu ukwenda kwabantwana ethi umuntu wonke kakuthole kungumlandu wakhe ukuthi amangalele abazali kunye lezigaba eziyendisa abantwana besasebancane.

UNkosazana Prisca Sibanda uthi abazali baphakathi kobunzima ngoba uhumumende wabathathela amandla okuthi bakhuze abantwana sekulomonakalo abantwana sebezendisa bebancane.

Osakhulayo, uPatience Nyathi, uthi kumzwisa ubuhlungu ukwenda kwabasakhulayo esola uhulumende osethathele abasakhulayo ilungelo labo lokufunda ethi banengi abantwana abaswela imali yesikolo bacine besenda besesebancane.

UNkosikazi Sikhululekile Moyo uthe uhulumende lamakhansia savumela ukwanda kwamabhawa lapho abasakhulayo abagcwala khona babuye sebelezisu ethi lenkokheli zomdabu azibone ukuba ezigabeni zabo akulabantwana abenda besasebancane.

Ukwenda kwabantwana abangamankazana ludubo olubhekane lomhlaba jikelele kodwa kuvame kakhulu kumazwe alobuyanga.

EZimbabwe ukwenda kwabantwana abangamantombazana kuvamile kakhulu umakuqathaniswa labantwana abangabafana abaleminyaka engaphansi kwetshumi lasifica minwe mbili, njalo ucwaningo olwenziwa yiMultiple Indicator Survey ngo2009 luthi abesifazana abaleminyaka engamatshumi amabili kusiya kuminyaka engamatshumi amane lasificamunwe munye oyedwa wabo phakathi kwabathathu kwabangamatshumi amathathu lantathu ekhulwini baya emacansini bengakafikisi iminyaka elitshumi lasificaminwe mibili kuthi abafana lamankazana aleminyaka engaphansi kwamatshumi amabili bayaphatheka kwezemacansini.

Facebook Forum

XS
SM
MD
LG