Amalunga edale lephalamende le Senate athi uhulumende kumele awathengele izimota ezintsha njengoba lezo alazo azithola ngomnyaka ka2009 sezitshudule umhlaba zaze zaphela insimbi lamabhawudo.
Umgcinisihlalo wekhomithi ekhangelane lenhlalakahle yamalunga la uMnu. Paddington Zhanda uthi amalunga amabandla wonke akuhulumende womanyano afuna ukuthi athengelwe imota loba nje ilizwe lingela mali.
Umnu. Zhanda uthi kusobala ukuthi uzulu kasoze akwamukele lokhu ngenjabulo. Uqhubeke esithi okwamanje amalunga akesenelisi ukuhamba ngezimota lezi ezikade zisetshenziswa njalo ukuthapha imbono kazulu emaphandleni kuhlelo lokulotshwa kwesisekelo sombuso esitsha selizwe.
Omele iGwanda North edale lephalamende uMnu. Thandeko Zinti Mnkandla uthi imota zabo sezibulewe yimgwaqo yemaphandleni.
