Ugatsha olubona ngezedale lephalamende lukangelelwe ukunika ngoMvulo uMongameli Robert Mugabe lenhloko kahulumende uMnu. Morgan Tsvangirai ugwalo olujulileyo olulamabizo amalunga edale leli ayehluleke ukuveza ukuthi asebenzise njani imali yokuthuthukisa izabelo iConstituency Development Fund.
Umnu. Eric Matinenga umphathintambo wogatsha lolu utshele iStudio 7 ngoLwesihlanu ukuthi amalunga la alitshumi lasitshiyangalo mbili kenelisanga ukuveza ingwalo zokuthi asebenzise njani imali le okumele ibe ngeyenhlelo zikazulu ezinjengo kwakha izikolo lamadamu.
UMatinenga owale ukuqamba amagama amalunga la uthi avela kumabandla atshiyeneyo akuhulumende womanyano.
Uphinde wathi akwaziwa ukuthi uMugabe loTsvangirai bazaluphatha njani loludaba njengoba bele mbono etshiyeneyo yokubusa ilizwe.
Amalunga wonke edale lephalamende aphiwa inkulungwane ezingamatshumi amahlanu amadola nguhulumende ngomnyaka ka 2010 yokuthuthukisa izabelo kodwa amanye awo acatshangelwa ukuthi ayitshayela esikhewini.
Umphathintambo wezamanzi uMnu. Samuel Sipepa Nkomo okubandla le MDC elikhokhelwa nguMnu. Tsvangirai uthi amalunga lawo azatholakala ukuthi adla imali yekothuthukisa izabelo kuzamele abotshwe.
