Amalunga ebandla leMDC-T abikwa etshaywe kabuhlungu ngabacatshengelwa ukuthi ngamalunga ebandla leZanu PF elokitshini leKambuzuma ngeSonto.
Abanye abatshayiweyo babikwa begijime bayabika emapholiseni kodwa kwaba yibo abavalelwalayo esitokisini bakhululwa ngemva kwesikhathi.
Kuthi ngoMvulo amapholisa abikwa ebophe abasekeli beMDC-T abathathu ababalisa usibalukhulu wezenzakala elizweni owebandla leli esigabeni se Harare Province, uMnu. Taruvinga Magaya basiwe enkambeni ye Harare Central police station.
Akwazakali ukuthi betheswa cala bani njalo lokuthi bazasiwa nini emthethwandaba.
Lokhu kuhle kwabangela ukuthi kungabi loya emapholiseni njalo. Sixoxe lomsekeli wesikhulumeli sebandla leMDC-T, uNkosazana Thabitha Khumalo ukuze sizwe okunengi ngaloludaba.
Kutsho uKhumalo: "Izolo ibandla lethu besilomhlangano eKambuzuma. Umhlangano ungakaqalisi abalandeli lenkokheli yebandla yethu baqale bayenza i car rally. Bathe befika lapho okwazakala kulama war vet khona baqala ukujikijelwa ngamatshe."
UMaKhumalo uthi baphenduke emuva bayayenza umhlangano wabo kodwa uthe uphela bazithola sebevalelwe indlela zonke zokuphuma elokitshini leli.
Uthi baqale ukujikijelwa ngamatshe kwalimala abanengi abafika amatshumi amabili basiwa esibhedlela lapho abanye abelatshwe kwasala abanye besesibhedlela.
"Amapholisa elizwe lethu ngawe Zanu PF esikhathini esinengi nxa abasekeli bethu besihlukuluza njengamalunga eMDC kababotshwa," kutsho uMaKhumalo.
Asenelisanga ukuzwa ukuthi ibandla leZanu PF kuloludaba.
