amalinks wokungena

Breaking News

Amalunga eZanu PF Enza Ubudlwangudlwangu Ecunulwa Ngumhlangano Wezombusazwe


Gorden Moyo

Umhlangano kazulu obubizwe ukuzaxoxisana ngenotho yelizwe kanye lezombusazwe uphele masinya ngemva kokuba abacatshengelwa ukuthi yintsha yebandla leZanu PF iqale ubudlwangudlwangu isola kade kukhulunywe yizikhulumi kulumhlangano oyenzelwe eSmall City Hall izolo.

Umsindo uqhamuke ngemva kokuthi izikhulumi zithi ibandla leZanu PF alilalutho elilukholwayo, lintshintsha ntshintsha minyaka yonke lidinga lokhu okungalisebenzela okuyikho osekubulele inotho yelizwe.

Ngemva kokuthi omunye ongene lumhlangano athi amabandla aphikisayo athanda abamhlophe, esinye sezikhulumi, uDr Gorden Moyo, owe MDC Renewal Team, uthi bayafana lebandla leZanu PF lona eliluma liphozisa, nanku lasebenzelana labamhlophe ngesikhathi kukuhle kilo.

UMoyo uthi minyaka yonke iZanu PF iyaguqula lokhu ekumeleyo, inike izizatho ezitshiyeneyo ukuthi kungani ingaguquli impilo zabantu, ithi ngumhlabathi osezandleni zabelungu, kusasa kube yizijeziso zenotho zelizwe ezivela kumazwe asentshonalanga, kwelizayo kube yilokhu lalokhuya lona iqiniso kuyikuthi livele alenelisi ukukhokhela ilizwe.

Evumelana lezinye izikhulumi, abamnumzana Moses Mzila Ndlovu oweMDC ekhokhelwa nguWelshman Ncube, uJoel Gabbuza oweMDC ka Morgan Tsvangirai kanye loJacob Dube oweZAPU, uDr Moyo uthi udubo lwelizwe leli alusi notho yelizwe kodwa yikuswela inkokheli kwezombangazwe ezilolwazi lokuthi ilizwe libuswa njani kubekwe zinqumo bani njalo kuqakathekiswe ziphi inhlangothi ukuze kube lengqubelaphambili.

Umhlangano lo ubuqoqwe yinhlanganiso yeBulawayo Agenda ibambane leyeCrisis Coalition in Zimbabwe.

Umqondisi wenhlanganiso le, uMnumzana Mmeli Dube uthi bebenxusile ilunga lebandla le Zanu PF ukuzakhuluma kulumhlangano kodwa akubuyanga muntu kweza abasekeli kuphela.

Lanxa bedinga ukuvusa umsindo, uthi kabasoze bekele ukunika uzulu ithuba lokuqhoba ithambo endawonye lenkokheli ezitshiyeneyo ngenxa yabantu abalutshwane abangenelisi ukuhlonipha imbono yabanye.

Uveze njalo ukukhathazeka ngokuthula kwamapholisa abekulo umhlangano, esithi sikhathi sonke bedinga imvumo yokuphatha imihlangano amapholisa athi ayenzela ukuthi abe khona afake ukuthula lapho kuqhamuka umsindo.

Ongene lumhlangano, uMnumzana Dingumuzi Mdlongwa, uthi amabandla aphikisayo ajikelana inyoka iphila, ethi udubo libandla leZanu PF kodwa lawo kumele avume amaphutha awo.

Wethese inkokheli lezi zamabandla aphikisayo umlandu wokuthi zithanda ukuzinakekela zona zodwa zingakhathali ngozulu lenotho yelizwe nanku zangena kuhulumende womanyano zadla zakhohlwa ukuthi ikusasa iyabekelwa.

Uqhubeke esithi ukuqamuqamuka kwamabandla la kutshengisa ukuthi yiwo angazimiselanga ukusebenzela uzulu kungakho kangathwalisi umlandu wonke kubandla leZanu PF.

Umhlangano o ubujonge ukuxazulula insindabaphenduli yokuswelakala kwengqubelaphambili kuleli ngaphansi kwesihloko esithi, ‘Hope or Doom: The State of the Economy, Politics and the Future of Zimbabwe’. Omunye obenxuswe ukuzabayisikhulumi ongasafikanga nguMnumzana Jabulani Sibanda owake wakhokhela labo abalwa impi yombangazwe engakaxotshwa kubandla leZanu PF.

UNothando Sibanda usipha loludaba.

please wait

No media source currently available

0:00 0:05:04 0:00
Lapho esitholakala khona


XS
SM
MD
LG