Amalunga ebandla leZANU PF avela ezigabeni zonke zelizwe abelokhu efika ngoLwesine emhlanganweni omkhulu weConference yalelibandla eEsigodini eMatabeleland South, njalo umongameli Emmerson Mnangagwa unikeze ngokusemthethweni isikolo seSacred Heart Girls’ High School kulindawo isakhiwo sokufundela.
Umongameli Mnangagwa, obemelwe ngumphathintambo wezemfundo uMnu. Paul Mavima uthe kufanele umphakathi uqakathekise imfundo yamantombazana, ikakhulu kuzifundo zeScience.
Ezinye iziphathamandla zalelibandla ebezikulumkhosi zibalisa oMnu. Cain Mthema, loAbednico Ncube. Bekuleminye imicimbi-cimbi etshiyeneyo, egoqela eyokuhlanyela izihlahla lokukhankasela amalungelo abantwana labesifazana kulindawo.
Umhlangano we conference lo, obizwa ngokuthi yi17th Annual National People’s Conference, uqhutshwa phansi kwendikimba ekhomba imizamo yokulungisa umnotho welizwe ethiwa “Zimbabwe Is Open for Business: Peace, Unity towards an Upper Middle-Income Economy By 2030,” ukhangelelwe ukusungulwa ngoLwesihlanu uphele ngoMgqibelo. UMnu. Joseph Tshuma, ilunga ledale leCentral Committee yeZANU PF, osefikile emhlanganweni, uchasisele uSithandekile Mhlanga weStudio 7 okunengi ngaloludaba.
