Amalungiselelo eqembu elimela ilizwe emdlalweni wenguqu elama Warriors okuyaphatheka kumncintiswano we African Nations Championships aphazamiseke kakhulu yikungazwanani obekuphakathi kwenkokheli yenhlanganiso ye Zifa lomqeqetshi waleliqembu uKallisto Pasuwa.
Umqeqetshi weqembu lama Warriors uKallisto Pasuwa uthi isikhathi esibalahlekele ngesikhathi kulokungezwani phakathi kwakhe lenhlanganiso ye Zifa siphazamise inhlelo zabo ngoba abadlali imizimba yabo isibuthathakathaka.
Iqembu lama Warriors lilahlekelwe zinsuku ezithile ezokuzilolonga ngemva kokuxabana okube khona phakathi kuka Pasuwa lenhlanganiso yeZifa edale ukuba lumqeqetshi ekhutshwe esikhundleni okwensuku ezimbalwa kwathi leqembu ladilizwa.
Kuthe ngemva kokuba abanye abaqeqetshi beyale ukuthatha lesisikhundla kwathi lozulu esechothoze lesisenzo sokuxotshwa kukaPasuwa inhlanganiso yeZifa yasikhumisana umlotha laye wabuyela emsebenzini.
Phezu kwalokho ukaputeni weqembu uDanny Phiri ngomunye wabadlali baleliqembu ababikwa belimele njalo kungakacaci ukuba bazabe sebepholile yini ngesikhathi leliqembu sekumele liphakame liye eRwanda lapho okuzaqhutshelwa khona imidlalo ye Chan ekuqaleni komnyaka ozayo.
Omunye umdlali olimeleyo ngunozinti uTakabva Mawaya yena olimele ihlombe.
Ilizwe leZimbabwe seliphatheke kuyo yonke imncintiswano ye Chan selokhu limidlalo yasungulwayo ngomnyaka ka 2009.
………………………………………………………………………………………………………………………………………………………………………………………………………………………………
Iqembu elimela ilizwe emdlalweni kakhilikithi lizadibana lele Afghanistan kusasa emdlalweni wesibili owohlobo lwe One Day International lidinga ukuphindisela ukudliwa elikwenziwe ngama runs angamatshumi amane lathoba munwe munye liqembu elifanayo ngosuku lwekhisimusi.
Indlela iqembu le Zimbabwe elidliwe ngayo lapho lisehluleka ukufikisa ama runs alikhulu idanise abanengi abalandela umdlalo kakhilikithi abagoqela umphathintambo wogatsha lwezemidlalo uMakhosini Hlongwane.
Iqembu le Zimbabwe lele Afghanistan azadlala imidlalo emihlanu eyohlobo lwe One Day International okutsho ukuba abafana baka Dave Whatmore balakho ukuphindisela njengoba lumdlalo wakusasa ungowesibili.
Lokhu akusoze kube lula kodwa njengoba iqembu le Afghanistan linqobe ele Zimbabwe kumncintiswano ye ODI leye Twenty20 emidlalweni edlalelwe kwele Zimbabwe kunyanga ezimbalwa ezedluleyo.
Ngemva kwemidlalo yeODI lawamaqembu azadibana kumidlalo emibili eyohlobo lwe Twenty20.